नगर जिल्ह्यात थंडीमुळे रब्बीच्या गहू, हरभरा पेरणीला वेग!

गेल्या ऑगस्ट, सप्टेंबर व ऑक्टोबर या महिन्यात जिल्ह्यात सतत पाऊस सुरू होता. अनेक ठिकाणी अतिवृष्टी झाली. त्यामुळे खरीप पिकांचे, शेतजमिनीचे व पशुधनाचे मोठे नुकसान झाले. त्यातून अद्याप शेतकरी सावरलेला नाही. सरकारकडून नुकसान भरपाईची रक्कमही सर्व शेतकऱ्यांना अद्याप मिळालेली नाही. अनेक ठिकाणी अतिवृष्टीने व पुराच्या पाण्याने शेतजमिनी खरवडून वाहून गेल्या आहेत.

अनेक ठिकाणी जमिनी सतत पाण्याखाली राहिल्याने त्या कडक झाले आहेत. परिणामी यंदा रब्बीच्या पेरणीस शेतकऱ्यांना उशीर झाला आहे. शेतजमिनीची मशागत करून रब्बीची पेरणी आता उशिरा का होईना अतिवृष्टी झालेल्या भागात सुरू झाली आहे.

जिल्ह्यात साधारणपणे गोकुळाष्टमीनंतर रब्बी ज्वारीच्या पेरणीला सुरुवात होते. यंदा मात्र उशिराने पेरणी सुरू झाली आहे. त्याचा परिणाम म्हणून जिल्ह्यात ज्वारीचे क्षेत्र वाढण्याची शक्यता व्यक्त केली जाते. यंदा ज्वारीसाठी १ लाख ६२ हजार ९०९ हेक्टर क्षेत्रावर पेरणीचे उद्दिष्ट ठेवण्यात आले आहे, आत्तापर्यंत ६४ हजार ४८ हेक्टरवर म्हणजेच ३९.३२ टक्के क्षेत्रावर पेरणी झाली आहे.

तर गव्हासाठी १ लाख २८ हजार ४६२ क्षेत्राचे उद्दिष्ट ठेवण्यात आले आहे, त्यापैकी १७ हजार २५६ हेक्टर क्षेत्रात गव्हाची पेरणी झाली आहे. ही पेरणी अवघी १३.४३ टक्के असली तरी, कडाक्याची थंडी सुरू झाल्याने गव्हाची पेरणी वाढू लागली आहे.

मका क्षेत्राचे ४८ हजार २८१ क्षेत्रावर नियोजन करण्यात आले आहे. त्यापैकी १५ हजार ९३ हेक्टर क्षेत्रावर म्हणजेच ३१.७६ क्षेत्रावर पेरणी झाली आहे. हरभऱ्यासाठी १ लाख ८ हजार ३४५ हेक्टर क्षेत्राचे उद्दिष्ट आहे पैकी ३० हजार ७४३ हेक्टर क्षेत्रावर पेरणी झाली आहे, असे क्षेत्र ३८.४८ टक्के आहे. नवीन उसाच्या लागवडीसाठी ९४ हजार ६९३ हेक्टर क्षेत्राचे उद्दिष्ट आहे पैकी ३८ हजार ६९१ हेक्टर म्हणजेच ४०.९६ टक्के क्षेत्रावर लागवड झाली आहे.

जिल्ह्यात सरासरीपेक्षा अधिक पाऊसमान झाल्याने भूगर्भातील पाण्याच्या पातळीत वाढ झाली आहे. विहिरी, कूपनलिकांना पाणी चांगले आहे. गावतळे, पाझर तलाव भरलेले आहेत. धरणातही पर्याप्त पाणीसाठा आहे. गहू, हरबराचे क्षेत्र वाढण्यास त्याची मदत होणार आहे.