शिक्षणावरून प्रश्न उठवणाऱ्यांना अनन्या पांडेनं दिले पुरावे

प्रमाणपत्रांचे फाईल्स समोर ठेवून अनन्याने हा फोटो काढला आहे. ‘युनिव्हर्सिटी ऑफ सदर्न कॅलिफोर्निया’ची काही कागदपत्रं या फोटोत पाहायला मिळत आहेत. शिक्षणावरून तिची खिल्ली उडवणाऱ्यांना अनन्याने पुरावा दाखवत उत्तर दिलं आहे.

शिक्षण आणि अॅडमिशनची कागदपत्रं दाखवत अनन्याने पोस्टच्या कॅप्शनमध्ये लिहिलं, ‘मला हे करायचं नव्हतं. स्वत:ला सिद्ध करायची गरज आहे असं मला वाटलं नव्हतं. मात्र ‘युएससी’मध्ये माझं अॅडमिशन झालंच नाही अशा अफवा माझ्या अवतीभवती फिरत आहेत. सर्वांत वाईट गोष्ट म्हणजे माझ्या कुटुंबीयांना आणि मित्र-मैत्रिणींनाही या चर्चांचा सामना करावा लागत आहे.’ अनन्याने तिच्या पोस्टद्वारे सांगितले की चित्रपटाच्या शूटिंगमुळे तिला दोन वेळा प्रवेशप्रक्रिया पुढे ढकलावी लागली. प्रवेशप्रक्रिया मी आणखी पुढे ढकलू शकत नव्हती म्हणून अभिनयातच करिअर करण्याचा निर्णय मी घेतला.

View this post on Instagram

A post shared by Ananya ? (@ananyapanday)

‘जे लोक मला खाली पाडण्याचा प्रयत्न करत आहेत त्यांना माझ्याकडून खूप सारं प्रेम, शांती आणि सकारात्मकता. कारण जे माझे क्लासमेट्स असल्याचा दावा करत आहेत ते माझे क्लासमेट्स नाहीत. कारण ज्यांच्यासोबत मी लहानाची मोठी झाली, ज्यांच्यासोबत मी शाळेत गेली ते माझ्यासोबत असं कधीच वागणार नाहीत किंवा माझ्यावर आरोप करणार नाहीत,’ असंही तिने स्पष्ट केलं.

अमेरिकेतील विद्यापीठात प्रवेश घेतला असल्याची खोटी माहिती अनन्या देत असल्याचं काहींचं म्हणणं आहे. या विद्यापीठातील एका विद्यार्थीनीनं अनन्या  नावाच्या कोणत्याही व्यक्तीनं प्रवेश घेतला  नसल्याचा दावा  केला. त्यानंतर अनन्याला ट्रोल करण्यात आलं.

‘स्टुडंट ऑफ द इअर २’मधील अनन्याच्या अभिनयाची प्रेक्षकांकडून प्रशंसा झाली. ती ‘पती पत्नी और वो’ या चित्रपटाच्या रिमेकमध्ये झळकणार आहे. यामध्ये तिच्यासोबत कार्तिक आर्यन आणि भूमी पेडणेकर यांच्याही मुख्य भूमिका आहेत.