टेनिस स्टार सानिया मिर्झाची बहीण अनम मिर्झा भारतीय क्रिकेट संघाचा माजी कर्णधार मोहम्मद अझरुद्दीन यांचा मुलगा असदला डेट करत आहे. यावर्षाअखेर अनम आणि असद निकाह करणार असल्याचंही कळतंय. अनमचा हा दुसरा निकाह असून गेल्याच वर्षी तिने पती अकबर रशीदशी घटस्फोट घेतला. २०१६ मध्ये अनम आणि अकबर यांचा निकाह पार पडला होता आणि दोन वर्ष पूर्ण होण्याआधीच ते विभक्त झाले. अनम असदपेक्षा वयाने तीन वर्षांनी मोठी आहे. या दोघांना अनेकदा कार्यक्रमांमध्ये एकत्र पाहिलं गेलं. सानियाने नुकताच असदचा एक फोटो सोशल मीडियावर शेअर करत कॅप्शनमध्ये 'फॅमिली' (कुटुंब) असं लिहिलं होतं. अनम फॅशन डिझाइनर असून तिचे स्वत:चे फॅशन आऊटलेटदेखील आहे. तर वडिलांप्रमाणेच असदला क्रिकेटमध्ये करिअर करायचे असून त्याची नुकतीच गोव्याच्या रणजी टीममध्ये निवड झाली आहे. अनम आणि रशीद यांचा निकाह २०१६ मध्ये धूमधडाक्यात पार पडला होता. यात चित्रपट, राजकारण आणि फॅशन जगतातील अनेक मान्यवरांची उपस्थिती होती. बॉलिवूड स्टार सलमान खान, परिणिती चोप्रा, अर्जुन कपूर यांच्यासह अनेक सेलिब्रिटी उपस्थित होते.
