ज्येष्ठ अभिनेत्री शबाना आजमी यांना भारतीय रेल्वेची माफी मागावी लागली आहे. झालं असं की, शबाना आजमी यांनी ट्विटरला एक व्हिडीओ पोस्ट केला होता ज्यामध्ये कर्मचारी घाणेरड्या पाण्यात प्लेट्स धुत होते. हे कर्मचारी भारतीय रेल्वेचे आहेत असं समजत शबाना आजमी यांनी केंद्रीय रेल्वेमंत्री पियूष गोयल यांनाही टॅग केलं होतं. शबाना आजमी यांनी पोस्ट केलेल्या ३० सेकंदाच्या व्हिडीओत काही कर्मचारी खड्ड्यात साचलेल्या घाणेरड्या पाण्यात प्लेट्स धुताना दिसत होते. सोमवारी सकाळी शबाना आजमी यांनी व्हिडीओ पोस्ट करत पियूष गोयल यांना पाहण्याचं आवाहन केलं होतं. संध्याकाळी रेल्वे मंत्रालयाने स्पष्टीकरण देत त्यांना त्यांची चूक लक्षात आणून दिली. Mam, video is of Malaysian eatery which faces closure after video shows workers washing dishes in puddle of murky water: Link News is — Ministry of Railways (@RailMinIndia) June 5, 2018 मॅडम हा व्हिडीओ मलेशिअन रेस्टॉरंटमधील असल्याचं रेल्वे मंत्रालायने ट्विटरला रिप्लाय देत सांगितलं. यावेळी त्यांनी एक बातमीची लिंकही सोबत दिली. यानंतर लगेचच आपली चूक लक्षात येताच शबाना आजमी यांनी माफी मागितली. पण तोपर्यंत ट्विटरकरांना आयती संधी मिळाली होती. त्यांनी शबाना आजमी यांना ट्रोल करत रेल्वेला त्यांच्याविरोधात अब्रूनुकसानीचा दावा ठोकण्यास सांगितलं. यानंतर शबाना आजमी यांनी आपण पुन्हा एकदा आपण बिनशर्त माफी मागितलं असल्याचं सांगितलं.