दिवंगत संगीतकार व गायक वाजिद खान यांच्या आई रझिना यांचा करोना रिपोर्ट पॉझिटिव्ह आला आहे. वाजिद खान यांचं सोमवारी मुंबईतील रुग्णालयात कार्डिअॅक अरेस्टने निधन झालं. रुग्णालयात दाखल केल्यापासून वाजिद यांची आई त्यांच्यासोबत होती असं समजतंय. 'एबीपी न्यूज'ने दिलेल्या वृत्तानुसार, वाजिद यांच्याआधीच त्यांच्या आईला करोनाची लागण झाली होती. किडनीच्या संसर्गामुळे रुग्णालयात दाखल केलेल्या वाजिद यांचा नंतर करोना रिपोर्ट पॉझिटिव्ह आला होता. रझिना यांची प्रकृती ठीक असल्याची माहिती समोर येत आहे. वाजिद यांचा मृत्यू कार्डिअॅक अरेस्टने झाल्याची माहिती साजिद खान यांनी पीटीआयशी बोलताना दिली. त्याचसोबत नंतर त्यांचा करोना रिपोर्टही पॉझिटिव्ह आल्याचं त्यांनी सांगितलं. सोमवारी दुपारी वाजिद खान यांच्या पार्थिवावर अंत्यसंस्कार करण्यात आले. लॉकडाउन आणि करोना व्हायरसच्या भीतीमुळे फक्त २० जणांना अंत्यसंस्काराला जाण्याची परवानगी देण्यात आली होती. पोलिसांच्या सुरक्षेत आणि निवडक कुटुंबीयांच्या उपस्थितीत वाजिद यांच्या पार्थिवावर अंत्यसंस्कार करण्यात आले. वाजिद खान यांच्या निधनावर कलाविश्वातून शोक व्यक्त करण्यात आला. अमिताभ बच्चन, सलमान खान, कतरिना कैफ, अक्षय कुमार, सोनम कपूर यांनी सोशल मीडियाद्वारे त्यांना श्रद्धांजली वाहिली.
