‘मी तेव्हाच लग्न करेन जेव्हा…’ रणबीर कपूरसोबतच्या नात्यावर आलियानं सोडलं मौन

आलिया भट्ट सध्या तिचा आगामी चित्रपट ‘गंगूबाई काठियावाडी’च्या प्रमोशनमध्ये व्यग्र आहे. दरम्यान ‘बॉलिवूड बबल’ला दिलेल्या मुलाखतीत आलियाला, ‘तुझ्या कामापेक्षा जास्त चर्चा तू लग्न कधी करणार याची होताना दिसते त्यामुळे तुला फरक पडतो का?’ असा प्रश्न विचारण्यात आला. त्यावर उत्तर देताना आलिया म्हणाली, ‘मला माहीत नाही. कदाचित मला आठवतही नाही की मला यामुळे काही फरक पडतो किंवा नाही.’

आलिया पुढे म्हणाली, ‘मागच्या काही दिवसांमध्ये बऱ्याच कपल्सनी लग्न केलंय त्यामुळे मला वाटतं की, आम्ही कपल आहोत तर आम्ही पण आता लग्न करावं असा विचार लोक करतात. पण माझ्यासाठी या सर्व गोष्टी माझ्या भावनांवर अवलंबून आहेत की, मला नक्की काय करायचं आहे आणि जे काही करायचं असेल ते योग्य वेळीच करायला हवं. मी तेव्हाच लग्न करेन जेव्हा मी या सर्व गोष्टींसाठी तयार असेन किंवा कम्फर्टेबल असेन. हीच गोष्ट रणबीरसाठीही लागू होते.’

या मुलाखतीत आलिया म्हणाली, ‘हे पाहा आम्हा दोघांचंही एकमेकांवर प्रेम आहे आणि मला वाटतं माझ्या आयुष्यात आतापर्यंत आलेल्या सर्व व्यक्तींमध्ये तो सर्वात चांगला व्यक्ती आहे. ज्या प्रकारे मी त्याचा आदर करते, माझ्या मनात त्याच्याबद्दल प्रेम आहे. ज्याप्रकारे तो मला नेहमीच पाठिंबा देतो. अशा बऱ्याच गोष्टी प्रेमाखातर आहेत आणि मला वाटतं की तो देखील माझ्याबद्दल चांगलंच बोलेल. सर्व गोष्टी योग्य वेळी होती. खरं तर मी कधी लग्न करणार हे आता सांगणं खूप घाईचं होईल. पण जेव्हा आम्ही लग्न करू तेव्हा सर्वांनाच समजणार आहे.’