‘ब्लॅक’साठी एकही पैसा घेतला नव्हता’

त्यावेळी भन्साळीबरोबर इतक्या महत्वाच्या, चांगल्या चित्रपटामध्ये काम करणे हेच पुरेसे होते, असे अमिताभ यांनी स्पष्ट केले आहे. मला स्वत:ला त्यावेळी संजय लीला भन्साळींबरोबर काम करण्याची खूप इच्छा होती. त्यांनी केलेले सगळे चित्रपट मी पाहिलेले होते. त्यामुळे त्यांच्याबरोबर काम करण्याची संधी मिळते आहे म्हटल्यानंतर मी स्वत:चा भारावून गेलो होतो. त्यामुळे या चित्रपटासाठी मी कोणतेही मानधन घेतले नाही. या चित्रपटाचा मी महत्वाचा भाग होतो, हीच माझ्यासाठी मोठी गोष्ट होती, असे अमिताभ यांनी सांगितले. हा चित्रपट हेलन केलर यांच्या आयुष्यावर आधारित होता. यात राणी मुखर्जीने अंध तरूणीची भूमिका केली होती तर तिला शिकवणाऱ्या शिक्षकाच्या भूमिकेत अमिताभ बच्चन होते. या चित्रपटाच्या खास सोहळ्याला खुद्द ज्येष्ठ अभिनेते दिलीप कुमार उपस्थित होते आणि त्यांनी चित्रपटाची भरभरून तारीफ केली होती, असेही अमिताभ यांनी म्हटले आहे. चित्रपट संपला तेव्हा दिलीप साब हॉलबाहेर जाऊन उभे राहिले. त्यांनी माझा हात हातात घेतला आणि फक्त कौतूकभरल्या नजरेने त्यांनी माझ्याकडे पाहिलं. ही आठवण मी कायम जपून ठेवली आहे. भन्साळींनी त्या चित्रपटासाठी जेवढी बारीकसारीक मेहनत घेतली ती सगळी या चित्रपटातून दिसून येते, असंही अमिताभ यांनी म्हटलं आहे. बारा वर्ष उलटली हा चित्रपट प्रदर्शित होऊन.. मात्र या चित्रपटाचा प्रत्येक तपशील माध्या आयुष्यात कोरला गेला आहे. याच चित्रपटासाठी अमिताभ यांना दुसरा राष्ट्रीय पुरस्कार मिळाला. तर ‘ब्लॅक’ला त्यावर्षीचा राष्ट्रीय पुरस्कार मिळाला होता.