अनुष्का शेट्टीने वाढदिवसानिमित्त शेअर केले नव्या चित्रपटाचे पोस्टर; म्हणाली, “मोठ्या पडद्यावर…”

अनुष्का शेट्टी सोशल मीडियावर फारशी सक्रिय नसते. खूप महत्त्वपूर्ण माहिती जेव्हा लोकांपर्यंत पोहोचवायची असते, तेव्हाच ती या माध्यमाचा आधार घेताना दिसते. आज तिचा ४१ वा वाढदिवस आहे. तिने या निमित्ताने इन्स्टाग्रामवर तिच्या आगामी चित्रपटाचे पोस्टर शेअर केले आहे. या चित्रपटामध्ये ती एका शेफच्या भूमिकेमध्ये दिसणार आहे हे पोस्टर पाहून लक्षात येते. तिचा हा नवा अवतार प्रेक्षकांच्या पसंतीस पडला आहे. चित्रपटाच्या पोस्टरखाली कमेंट करत चाहत्यांनी तिला वाढदिवसाच्या शुभेच्छा दिल्या.

आणखी वाचा – धार्मिक भावना दुखावल्याचा वीर दासवर आरोप; नवा कार्यक्रम रद्द करण्याची हिंदू संघटनेची मागणी

“माझ्या वाढदिवशी माझ्या आगामी चित्रपटामधील ‘मास्टरशेफ अन्विथा रावली शेट्टी’ या पात्राची ओळख करून देताना मला खूप आनंद होत आहे. तुम्हा सर्वांना मोठ्या पडद्यावर भेटायला मी फार उत्सुक आहे”, असे कॅप्शन दिले आहे. यामध्ये तिने नवीन पॉलीशेट्टी आणि महेश बाबू पी यांनीही टॅग केले आहे. या आगामी चित्रपटामध्ये मल्याळम सुपरस्टार नवीन पॉलीशेट्टी तिच्यासह प्रमुख व्यक्तिरेखा साकारणार आहे. तर महेश बाबू पी या चित्रपटाचे दिग्दर्शन करणार आहेत. चित्रपटाच्या नावाची घोषणा लवकरच केली जाणार आहे.

आणखी वाचा – “मी त्यावेळी दारोदारी फिरत होतो पण…” जितेंद्र जोशीने सांगितला महेश मांजरेकरांचा ‘तो’ किस्सा

‘बाहुबली २’ नंतर २०१८ मध्ये अनुष्काचा ‘भागमथी’ हा ब्लॅकबास्टर चित्रपट प्रदर्शित झाला होता. त्यानंतर तिने चिरंजीवी यांच्या ‘सायरा नरसिम्हा रेड्डी’ या ऐतिहासिक चित्रपटामध्ये छोटीशी भूमिका साकारली होती. तब्बल चार वर्षांनंतर मुख्य व्यक्तिरेखा असलेला तिचा चित्रपट प्रेक्षकांच्या भेटीला येणार आहे.