Bhadipa : रणवीर अलाहाबादियाच्या वादंगाचा भाडिपाला धसका, ‘अतिशय निर्ल्लज कांदे पोहे’चा एपिसोड पुढे ढकलला, पैसेही देणार परत

रणवीरने नेमकं काय म्हटलं होतं?

इंडिया गॉट लेटेंटमध्ये रणवीर अलाहाबादियाने एका स्पर्धकाला प्रश्न विचारला की तुला तुझ्या पालकांना आयुष्यभर सेक्स करताना पाहायला आवडेल की तुला त्यांच्याबरोबर सामील होऊन ते कायमचं थांबवायला आवडेल? त्याच्या या प्रश्नावर समय रैनाने सर्व त्याच्या पॉडकास्टचे रिजेक्ट झालेले प्रश्न असल्याचे म्हटले. रणवीरच्या याच प्रश्नामुळे त्याच्या अडचणी वाढल्या आहेत. या सगळ्यानंतर रणवीरने माफीही मागितली. मात्र त्याच्याविरोधात गुन्हा दाखल झाला आहे. तसंच लोकसभेत आणि राज्यसभेतही या प्रकरणाची चर्चा झाली. चौफेर टीका झाल्यानंतर आणि रणवीर तसंच समय या दोघांसह एकूण पाच जणांवर गुन्हा दाखल झाल्यानंतर भाडिपाने त्यांचा अतिशय निर्लज्ज कांदेपोहे हा सई ताम्हणकर बरोबरचा एपिसोड पुढे ढकलला आहे.

भाडिपाने नेमकं काय म्हटलं आहे?

भाडिपाच्या फॅन्सना कळवण्यात वाईट वाटतं आहे की सध्या वातावरण तापल्यामुळे १४ फेब्रुवारीला होणारा अतिशय निर्ल्लज कांदे पोहेचा शो आम्ही Postpone करत आहोत. तसंही Valentines Day ला प्रेमापेक्षा जास्त द्वेषच मिळतो. पण आमचं आमच्या Fans वर प्रेम आहे. आमच्या टॅलेंटला आणि प्रेक्षकांना कुठलाही त्रास होऊ नये म्हणून आम्ही हा निर्णय घेतला आहे. तिकिटांचा Refund 15 Working Days मध्ये तुमच्या Account वर जमा होईल. Refund ने स्वतःसाठी काहीतरी छान Gift घ्या. आम्हाला माहीत आहे की आमच्या Fans चंही आमच्यावर खूप प्रेम आहे आणि आमच्या Style ची कॉमेडी तुम्हाला आवडते. म्हणूनच आमचा Exclusive Content बघण्यासाठी खास YouTube Membership सुरु केली आहे. आम्ही अतिशय निर्लज्ज कांदेपोहेचे सर्व Videos 18+ वयासाठी Restrict केले आहेत. तुम्ही तुमच्या कुटुंबासह आमच्या चॅनलचा कंटेंट बघू शकता. अतिशय निर्लज्जपणे हा आमचा सभ्य Show लवकरच घेऊन येऊ. आमच्याकडून आम्ही पूर्ण प्रयत्न केला… पण तुमचा यंदाचाही Valentines Day घरीच बसून जाणार.

अशी पोस्ट भाडिपाने केली आहे. भाडिपाचा कांदेपोहे हा शो युट्यूबवर चांगलाच प्रसिद्ध झाला होता. त्यात भाग्यश्री लिमये, लीना भागवत या दोन प्रमुख कलाकार होत्या. त्यानंतर भाडिपाने अतिशय निर्लज्ज कांदे पोहे हा शो सुरु केला. ज्याचा एक एपिसोड पार पडला. त्यात भाग्यश्री लिमयेच होती. यानंतर पुढचा एपिसोड सई ताम्हणकरसह पार पडणार आहे. मात्र सध्या झालेल्या ताज्या वादाच्या पार्श्वभूमीवर भाडिपाने हा एपिसोड पुढे ढकलला आहे.