ओम राऊत दिग्दर्शित ‘आदिपुरुष’ चित्रपटाची सध्या सर्वत्र चर्चा सुरु आहे. चित्रपटात दाक्षिणात्य अभिनेता प्रभासने प्रभू श्रीरामाची, तर अभिनेत्री क्रिती सेनॉनने सीतेची भूमिका साकारली आहे. चित्रपटाची संपूर्ण टीम सध्या प्रमोशनमध्ये व्यग्र असून याचदरम्यान अभिनेत्री क्रिती सेनॉनने चित्रपटात तिने साकारलेल्या भूमिकेचा फोटो सोशल मीडियावर शेअर केला आहे.
क्रिती सेनॉनने सीता मातेच्या भूमिकेतील फोटो शेअर करून त्याला “सीता मॉं, माय जानकी” असे कॅप्शन दिले आहे. अभिनेत्रीने शेअर केलेला फोटो पाहून नेटकऱ्यांनी तिला चांगलेच ट्रोल केले आहे. क्रितीने शेअर केलेल्या फोटोवर कमेंट करीत अनेकांनी तिला “कृपया स्वत:ची तुलना सीता मातेबरोबर करून नकोस” असे सांगितले आहे.
हेही वाचा : ‘द आर्चीज’: एकाच चित्रपटातून पदार्पण करणार ३ स्टारकिड्स; नेटकरी म्हणाले “पुन्हा नेपोटीजम…”
अभिनेत्री क्रिती सेनॉनच्या फोटोवर कमेंट करीत एका युजरने लिहिले की, “सीता माता महान आहे तिचे पात्र तुला शोभत सुद्धा नाही”, तर दुसऱ्या एका युजरने लिहिले आहे “रामायणातील पाच श्लोक सुद्धा तुला येत नसतील.” दरम्यान, क्रितीने इन्स्टाग्रामवर दोन फोटो शेअर केले आहेत. यातील पहिल्या फोटोमध्ये क्रितीने चित्रपटात साकारलेल्या सीतेच्या भूमिकेतील फोटो शेअर केला आहे आणि दुसरा फोटो तिच्या आईचा आहे.
‘आदिपुरुष’च्या ॲडव्हान्स बुकिंगला रविवारपासून सुरुवात झाली असून, या चित्रपटाच्या ॲडव्हान्स बुकिंगला खूप चांगला प्रतिसाद मिळताना दिसत आहे. २४ तासांच्या आत या चित्रपटाची ५० हजारांहून अधिक तिकिटे विकली गेली आहेत. त्यामुळे आतापर्यंत या चित्रपटाने ॲडव्हान्स बुकिंगमधूनच दोन कोटींच्या आसपास कमाई केली आहे. त्यामुळे या चित्रपटाचे सर्व शो हाऊसफुल्ल होणार अशी चिन्हे दिसत आहेत.
