“अजय आयुष्यात येण्यापूर्वी मी डेट करत होते, पण…” काजोलचा वैयक्तिक आयुष्याबद्दल मोठा खुलासा

काजोलने नुकतंच ‘ह्युमन्स ऑफ बॉम्बे’ या इंग्रजी वेबसाईटला मुलाखत दिली. या मुलाखतीत तिने तिच्या करिअरसह खासगी आयुष्याबद्दल भाष्य केले. यावेळी तिने अजय देवगण आणि तिच्या पहिल्या भेटीबद्दलचा किस्सा सांगितला. तसेच तिने ती अजय देवगणच्या आधी एका व्यक्तीला डेट करत होती, असा खुलासाही तिने केला आहे.
आणखी वाचा : अजय देवगण नव्हे तर ‘हा’ अभिनेता होता काजोलची पहिली पसंती, एक झलक पाहण्यासाठी असायची उत्सुक

“मी अजय पहिल्यांदा एका चित्रपटाच्या सेटवर भेटले होते. त्यावेळी मी एका व्यक्तीबरोबर फिरायला जायचे आणि तोही एका व्यक्तीबरोबर डेटवर जायचा. या चित्रपटादरम्यान आम्ही एकमेकांचे चांगले मित्र बनलो. त्यावेळी आम्ही गप्पा मारायचो. बोलायचो. आमची चांगली मैत्री झाली. त्यानंतर अचानक आमचा ब्रेकअप झाला. त्यानंतर आमच्यातील मैत्रीचे रुपांतर प्रेमात झाले”, असे काजोल म्हणाली.

दरम्यान त्यानंतर १९९५ मध्ये ‘हलचल’ चित्रपटाच्या दरम्यान अजय आणि काजोलची पहिली भेट झाली होती. अजय आणि काजोलने चार वर्ष एकमेकांना डेट केले होते. त्यानंतर त्यांनी लग्न करण्याचा निर्णय घेतला. अजयच्या कुटुंबियांनी त्यांच्या लग्नासाठी होकार दिला होता. मात्र काजोलने घरी सांगताच तिच्या वडिलांनी तिच्यासोबत चार दिवस बोलणे बंद केले होते.

आणखी वाचा : “मी आरशात पाहिलं अन्…” त्वचेच्या रंगात झालेल्या बदलावर काजोलचे स्पष्टीकरण

काजोलने तिच्या करिअरवर लक्ष केंद्रीत करावे असे तिच्या वडिलांना वाटत होते. पण नंतर काही दिवसांनी काजोलच्या घरातील देखील लग्नासाठी तयार झाले. त्यांनी १९९९मध्ये लग्न केले. अतिशय खासगी पद्धतीने त्यांचा विवाहसोहळा पार पाडला. अजय आणि काजोलच्या लग्नाला काही मोजक्याच लोकांनी हजेरी लावली होती.