अलीकडच्या काळात बॉलीवूड सिनेमांमध्ये इंटिमेट किंवा किसिंग सीन असणं सामान्य गोष्ट आहे. पण पूर्वी असं नव्हतं. चित्रपटातील इंटिमेट सीनवरून वाद व्हायचे. ८० च्या दशकातील एका चित्रपटात दोन अभिनेत्रींमध्ये जवळीक दाखवण्यात आली होती. त्यातील दृश्ये पाहून मोठा वाद निर्माण झाला होता. तब्बल १० कोटी रुपये खर्च करून निर्मिती करण्यात आलेला हा सिनेमा फ्लॉप ठरला होता. त्या काळी या चित्रपटामुळे बॉलीवूडलासुद्धा आर्थिक फटका बसला होता.
कमाल अमरोही यांनी बनवलेला ‘रझिया सुलतान’ हा चित्रपट १९८३ मध्ये रिलीज झाला होता. या चित्रपटाचं बजेट तब्बल १० कोटी रुपये होतं. हा तेव्हाचा सर्वात महागडा चित्रपट होता. यामध्ये हेमा मालिनी, धर्मेंद्र, परवीन बाबी, सोहराब मोदी आणि अजित असे दमदार कलाकार होते. मात्र चित्रपट बॉक्स ऑफिसवर सपशेल आदळला होता. प्रेक्षकांना चित्रपटात वापरलेली उर्दू भाषा समजली नाही, तर काहींनी हा सिनेमा खूप मोठा असल्याची टीका केली. धर्मेंद्र यांनी ॲबिसिनियन गुलाम योद्धा याकूतची भूमिका करण्यासाठी ब्लॅकफेसचा वापर केल्याची टीकाही झाली होती. १० कोटींचे बजेट असलेल्या ‘रझिया सुलतान’ने फक्त दोन कोटींची कमाई केली होती.
किसिंग सीनमुळे वादात अडकला चित्रपट
‘रझिया सुलतान’मध्ये सुरुवातीला राणीचा एकटेपणा, नंतर याकूतबरोबरचा रोमान्स या गोष्टी दाखवण्यात आल्या होत्या. यामध्ये खाकून नावाच्या मदतनीसची भूमिका परवीन बाबीने साकारली होती. या खाकून व रझिया यांच्यातील जवळीक, रोमान्स सिनेमात दाखवला होता. अमरोही यांनी दोघींमध्ये रोमान्स दाखवण्यासाठी एक प्रेम गीत वापरलं होतं. यात दोघींमध्ये गालावर किस करण्याचा एक सीन होता. त्याकाळी पडद्यावर समलिंगी किस दाखवणं मोठी गोष्ट होती. या सीनमुळे चित्रपटाबद्दल नकारात्मकता पसरली. त्यामुळे प्रेक्षकांनी त्याकडे पाठ फिरवली होती.
अमरोही यांनी कर्ज काढून बनवलेला सिनेमा
‘रझिया सुलतान’ चित्रपट तयार व्हायला बरीच वर्षे लागली होती. या चित्रपटासाठी शेकडो लोकांनी काम केलं होतं. अमरोही यांनी सिनेमा बनवायला इंडस्ट्रीतील खूप लोकांकडून कर्ज घेतलं होतं. त्यांनी क्रू मेंबर्सना चित्रपट रिलीज झाल्यावर पैसे देण्याचं वचन दिलं होतं. मात्र सिनेमा फ्लॉप ठरला, त्याचा परिणाम बॉलीवूडमधील इतर अनेक चित्रपटांवर झाला होता. आर्थिक संकट झालं होतं. चित्रपट फ्लॉप झाल्यावर अमरोही यांनी बहुतांश क्रू मेंबर्सना स्वतःच्या खिशातून पैसे दिले होता. मात्र काही वितरक आणि प्रदर्शकांना या सिनेमामुळे आर्थिक फटका बसला होता.
‘रझिया सुलतान’ अमरोहींचा शेवटचा चित्रपट
या चित्रपटामुळे आर्थिक फटका बसूनही बॉलीवूड सावरलं, मात्र ते कमाल अमरोहीनं जमलं नाही. हा सिनेमा फ्लॉप झाल्यावर त्यांनी मुघल शासक बहादूरशाह जफर यांच्यावर एक स्क्रिप्ट लिहायला सुरुवात केली, मात्र ती स्क्रिप्ट ते कधीच पूर्ण करू शकले नाही. १९९३ मध्ये कमाल अमरोही यांचे निधन झाले आणि ‘रझिया सुलतान’ हा त्यांचा शेवटचा चित्रपट ठरला.
