सनी देओलच्या ‘जाट’ चित्रपटाच्या कलेक्शनमध्ये झाली वाढ, तिसऱ्या दिवशी केली सर्वाधिक कमाई

‘जाट’ चित्रपटात पुन्हा एकदा सनी देओलचा ‘गदर’मधील अंदाज पाहायला मिळत आहे. १० एप्रिलला, पहिल्या दिवशी ‘जाट’ चित्रपटाने ९.५ कोटींची कमाई केली होती. पण, दुसऱ्या दिवशी कमाईत घट झाली. शुक्रवारी ११ एप्रिलला ‘जाट’ चित्रपटाने फक्त ७ कोटींचा गल्ला जमवला. माहितीनुसार, मुंबईतील ‘जाट’ चित्रपटाचे १०० आणि दिल्ली-एनसीआरमधील ३० असे देशाअंतर्गत ४०० हून अधिक शो रद्द केले. याचाच परिणाम ‘जाट’ चित्रपटाच्या दुसऱ्या दिवशीच्या कमाईवर झाल्याचं म्हटलं जात आहे. मात्र, प्रदर्शनानंतरच्या पहिल्या शनिवारी, १२ एप्रिलला सनी देओलच्या चित्रपटाला चांगला प्रतिसाद मिळाला.

सॅकनिल्कच्या अहवालानुसार, ‘जाट’ चित्रपटाने तिसऱ्या दिवशी बॉक्स ऑफिसवर १० कोटींची कमाई केली. त्यामुळे आतापर्यंत चित्रपटाने २६.५० कोटींचा टप्पा पार केला आहे. ‘जाट’ चित्रपटाच्या कमाईत होणारी हळूहळू वाढ पाहता, चित्रपट बॉक्स ऑफिसवर चांगली कमाई करेल, असा अंदाज लावला जात आहे. सनी देओलचा हा चित्रपट गोपीचंद मालिनेनी यांनी दिग्दर्शित केला आहे. १०० कोटींमध्ये ‘जाट’ चित्रपट तयार झाला आहे. यामध्ये सनी देओल व्यतिरिक्त रेजिन कॅसेंड्रा, रणदीप हुड्डा, विनीत कुमार सिंह, राम्या कृष्णन आणि जगपति बाबू यांसारखे बरेच कलाकार मंडळी झळकले आहेत.

दरम्यान, ‘जाट’ चित्रपटातील बरेच सीन कापण्यात आले आहेत. एकूण २२ बदल करण्यात आले आहेत. यामध्ये शिव्या, अपशब्दांसह बरेच हिंसक सीन्स होते, जे आता बदलण्यात आले आहेत. महिला निरीक्षकाच्या छेडछाडीचे दृश्य देखील हटवून लहान सीन करण्यात आला आहे. असं असलं तरी ‘जाट’ चित्रपटाविषयी सोशल मीडियावर प्रेक्षकांच्या प्रतिक्रिया चांगल्या उमटल्या आहेत. सनीच्या आजवरच्या करिअरमधील ‘जाट’ चित्रपट सर्वोत्कृष्ट असल्याचं काहींनी सांगितलं आहे. तर काहींनी दाक्षिणात्य चित्रपटाप्रमाणे ‘जाट’ असल्याचं म्हटलं आहे.