भारतीय क्रिकेटपटू महेंद्रसिंग धोनी याच्या जीवनावर आधारित ‘एमएस धोनी द अनटोल्ड स्टोरी’ हा चित्रपट २०१६ मध्ये प्रदर्शित झाला होता. या चित्रपटात सुशांत सिंह राजपूतने महेंद्रसिंग धोनीची भूमिका साकारली होती. त्याचबरोबर दिशा पटानी आणि कियारा अडवाणी यांच्याही या चित्रपटात महत्त्वाच्या भूमिका होत्या. या चित्रपटात कियाराने एमएस धोनीच्या पत्नीची तर दिशाने त्याच्या मैत्रिणीची भूमिका साकारली होती.
हा चित्रपट प्रदर्शित होऊन सात वर्षे पूर्ण झाली आहेत. यानिमित्ताने दिशा पटानीने सुशांतच्या आठवणीत सोशल मीडियावर एक पोस्ट शेअर केली आहे. या पोस्टमध्ये तिने एमएस धोनीची एक छोटी क्लिप शेअर केली आहे, हा व्हिडीओ शेअर करत दिशाने लिहिले “या सुंदर प्रवासाबद्दल आणि हिंदी चित्रपटसृष्टीतील माझा पहिला चित्रपटाला दिलेल्या प्रेमाबद्दल मी आभारी आहे. मनापासून प्रेम करा आणि अशा लोकांची कदर करा जे तुम्हाला खऱ्या अर्थाने आनंदित करतात. आपण निरोप घेऊ शकलो नाही पण मला आशा आहे की तू आनंदी असशील.”
दिशा पटानीच्या या पोस्टवर चाहते मोठ्या प्रमाणत कमेंट करत आहे. एका चाहत्याने कमेंट करत लिहले. “मी सुशांतला कधीच विसरत नाही, मला प्रत्येक वेळी त्याची खूप आठवण येते. हा माझा चित्रपटगृहात जाऊन बघितलेला शेवटचा चित्रपट होता. त्यानंतर मी कधीच चित्रपटगृहात गेलो नाही”. दुसऱ्या युजरने कमेंट करत लिहले, सुशांत मला तुझी खूप आठवण येते. तर आणखी एका युजरने कमेंट करत या चित्रपटातील दिशाच्या अभिनयाचे कौतुक केलं आहे.
