‘पठाण’चं नवं गाणं ‘झुमे जो पठाण’ प्रदर्शनासाठी सज्ज; शाहरुखने पोस्ट शेअर करत सांगितली तारीख, वेळ

आता ‘पठाण’मधील शाहरुख खान आणि दीपिका पदूकोण यांच्यावर चित्रित झालेलं आणखी एक गाणं प्रेक्षकांच्या भेटीला येणार असल्याचं स्पष्ट झालं आहे. ‘झुमे जो पठाण’ हे या चित्रपटातील दुसरं गाणं २२ डिसेंबर रोजी प्रदर्शित होणार आहे. या गाण्यातही शाहरुख आणि दीपिका यांची हॉट केमिस्ट्री पाहायला मिळणार आहे. शाहरुख खानने नुकतंच त्याच्या सोशल मीडिया अकाऊंटवरून या नवीन गाण्याचा फर्स्ट लूक पोस्टर शेअर केलं आहे. हे गाणं हिंदी, तमिळ आणि तेलुगू अशा ३ भाषांमध्ये प्रदर्शित होणार आहे.

आणखी वाचा : विश्लेषण : आता ‘अवतार २’, ‘पठाण’सारखे चित्रपट ICE Theatre मध्ये पाहाता येणार! काय आहे हे तंत्रज्ञान?

या पोस्टरमध्ये शाहरुख आणि दीपिका एका बोल्ड आणि डॅशिंग अवतारात दिसत आहेत. चित्रपटाचे दिग्दर्शक सिद्धार्थ आनंद हे या नव्या गाण्यासाठी चांगलेच उत्सुक आहेत. पिंकव्हीलाच्या वृत्तानुसार ते याबद्दल म्हणाले की, ““झुमे जो पठाण हे गाणं या चित्रपटातील पठाण या पात्राच्या जिद्दीला सलाम करणारं गाणं असेल. गाण्यातून शाहरुख साकारत असलेल्या गुप्तहेराच्या जबरदस्त व्यक्तिमत्त्वाचे पैलू उलगडणार आहेत. या गाण्यातील शाहरुखची एनर्जि, त्याचा आत्मविश्वास प्रत्येकाला गाण्यावर थिरकायला भाग पाडेल.”

शिवाय या नव्या गाण्यात दीपिकाचासुद्धा हॉट, बोल्ड अंदाज आणि शाहरुख-दीपिकामधील केमिस्ट्री पाहायला मिळणार आहे. हे याच्या नव्या पोस्टरवरून स्पष्ट होतच आहे. विशाल- शेखर यांनी संगीतबद्ध केलेलं हे नवं गाणं कव्वाली आणि मॉडर्न फ्यूजन याचं मिश्रण असणार आहे अशी चर्चा आहे. ‘बेशरम रंग’नंतर आता ‘झुमे जो पठाण’ हे गाणं प्रेक्षकांच्या पसंतीस पडतंय की यावरूनही काही वाद निर्माण होतोय ते गाणं प्रदर्शित झाल्यावरच समजेल. ‘पठाण’ २५ जानेवारीला चित्रपटगृहात प्रदर्शित होणार आहे.