“मंदिरात जाणं म्हणजे भाजपामध्ये प्रवेश करणं नाही”, प्रीती झिंटाने दिलं थेट उत्तर, म्हणाली…

प्रीतीनं तिच्या एक्स अकाऊंटद्वारे चाहत्यांशी संवाद साधला. त्यासाठी अभिनेत्रीनं एक्सवर ‘PZchat’ हे सेशन ठेवलं आणि त्याद्वारे तिच्या अनेक चाहत्यांनी तिला प्रश्न विचारले. या सेशनदरम्यान एका चाहत्यानं अभिनेत्रीला विचारलं, “तुझे काही महिन्यांपूर्वीचं ट्विट पाहिलं असता, असं वाटतं की, तू भाजप पक्षात प्रवेश करणार आहेस?” नेटकऱ्याच्या या प्रश्नावर प्रीतीनं थेट उत्तर दिलं आहे आणि तिच्या राजकारणातील प्रवेशाबद्दलच्या चर्चांना पूर्णविराम दिला आहे.

अभिनेत्रीनं नेटकऱ्याला उत्तर देताना असं म्हटलं, “सोशल मीडियावरील लोकांची हीच समस्या आहे. आजकाल प्रत्येक जण खूपच निर्णयात्मक झाला आहे. मी आधी म्हटल्याप्रमाणे, मंदिरात किंवा महाकुंभात जाणं आणि मी कोण आहे किंवा माझ्या ओळखीचा अभिमान बाळगणं म्हणजे राजकारणात येणं असं होत नाही किंवा त्या कारणास्तव भाजपामध्ये सामील होणं असंही नाही.”

That’s the problem with people on social media, everybody has become so judgemental off late. As I said earlier, going to a temple / Maha Kumbh and being proud of who I am & my identity does not equate with me joining politics or for that reason BJP. Living outside India has made… https://t.co/34PBYMSC9F

— Preity G Zinta (@realpreityzinta) April 28, 2025

पुढे प्रीतीनं असं म्हटलं आहे, “भारताबाहेर राहिल्यानं मला माझ्या मायदेशाचं खरं मूल्य कळलं आहे आणि इतरांप्रमाणे मी आता भारत आणि भारतीय असलेल्या सर्व गोष्टींना अधिक महत्त्व देते.” त्यामुळे आता प्रीतीच्या राजकारणातील प्रवेशाच्या सर्व चर्चांना आता पूर्णविराम लागला आहे. प्रीतीनं राजकारणात प्रवेश करणार नसल्याचं स्पष्ट करीत त्याबाबत स्वत: उत्तर दिलं आहे.

दरम्यान, ‘PZchat’ सेशनमध्ये अभिनेत्रीच्या विराट कोहलीबरोबरच्या व्हायरल फोटोवरही प्रतिक्रिया व्यक्त केली. दोन दिवसांपासून प्रीती आणि विराटचा फोटो सोशल मीडियावर व्हायरल होत आहे, ज्यात हे दोघे फोटोमध्ये बघून हसत आहेत. याच फोटोबद्दल एका चाहत्यानं अभिनेत्रीला ‘PZchat’ सेशनमध्ये प्रश्न विचारला होता.

त्या प्रश्नाचं उत्तर देताना प्रीती म्हणाली, “आम्ही आमच्या मुलांचे फोटो एकमेकांना दाखवत होतो आणि त्यांच्याबद्दल बोलत होतो. वेळ किती पटकन निघून जाते. १८ वर्षांपूर्वी जेव्हा मी पहिल्यांदा विराटला भेटले होते, तेव्हा तो एक उत्साही तरुण होता. आजही त्याच्यात तोच जोश आहे. त्याचबरोबर तो खूप गोड आणि प्रेमळ बाबाही आहे.”

दरम्यान, जीन गुडइनफशी लग्न केल्यानंतर प्रीती लॉस एंजेलिसला गेली. या काळात तिनं अभिनयापासून ब्रेक घेतला होता. लवकरच ती अभिनेता सनी देओल याच्याबरोबर ‘लाहोर १९४७’ या चित्रपटातून मोठ्या पडद्यावर पुनरागमन करणार आहे. त्यामुळे तिचे अनेक चाहते या चित्रपटाची वाट बघत आहेत.