शोले नव्हे तर ‘हा’ आहे धर्मेंद्र यांचा आवडता चित्रपट, म्हणाले, “सर्वात कठीण…”

धर्मेंद्र काय म्हणाले?

दी इंडियन एक्स्प्रेसला दिलेल्या मुलाखतीत, जेव्हा धर्मेंद्र यांना विचारण्यात आले की ‘शोले’च्या यशाने त्यांना आश्चर्यचकित केले का, तेव्हा त्यांनी उत्तर दिले, “मी तुम्हाला एक गोष्ट सांगतो. १९७५ मध्ये जेव्हा ‘शोले’ प्रदर्शित झाला तेव्हा त्याच्या दोन महिने आधी माझा आणखी एक चित्रपट प्रदर्शित झाला होता. त्याबद्दल कोणीही बोलत नाही. हा चित्रपट दुलाल गुहा यांचा ‘प्रतिज्ञा’ होता, जो मला सर्वांत जास्त आवडतो. मला एका ट्रक ड्रायव्हरची भूमिका करायची होती, जो पोलिस बनतो. ही भूमिका खूपच कठीण होती, ज्यामध्ये खूप भावना आणि ड्रामा होता. ते एक आव्हान होते आणि लोकांना त्यात मी आवडलो.”

ते पुढे म्हणाले, ‘शोले’ आणि ‘सत्यकाम’ हे माझे आवडते चित्रपट असले तरी जर आपण माझ्या सर्वकालीन आवडत्या चित्रपटाबद्दल विचाराल, तर तो ‘प्रतिज्ञा’ आहे. हा चित्रपट १९७५ मध्ये ‘शोले’च्याच काळात प्रदर्शित झाला होता. त्यामुळे बहुतेक लोकांच्या तो लक्षात आला नाही. पण, ‘शोले’शी स्पर्धा असूनही ‘प्रतिज्ञा’ सुपरहिट होता. ज्याप्रमाणे ‘नया जमाना’ १९७१ मध्ये प्रदर्शित झालेल्या ‘मेरा गाव मेरा देश’ या सुपरहिट चित्रपटाबरोबर हिट झाला होता. मला ‘नया जमाना’देखील खूप आवडला.”

जेव्हा धर्मेंद्र यांना विचारण्यात आले की, त्यांना कधी वाटले होते का की, ‘शोले’ त्यांच्या कारकिर्दीतील इतका मोठा टप्पा ठरेल? तेव्हा अभिनेत्याने उत्तर दिले, “नाही, मी कधीच असा विचार केला नव्हता. आम्ही सर्वांनी चित्रपटासाठी खूप मेहनत घेतली. त्याचे चित्रीकरण बंगळुरूच्या बाहेरील भागात झाले होते. त्यावेळी तिथे कोणतेही हॉटेल नव्हते. त्यामुळे आम्हाला चित्रीकरणासाठी बंगळुरूपासून ५० किमी अंतरावर प्रवास करावा लागायचा; पण ते खूप मजेदार होते. हेमा तिथे होती आणि जयाही होती.”