मराठी चित्रपटात अनेक उत्तम विषय अलीकडे चांगल्या प्रकारे हाताळलेले दिसतात. असाच एक वेगळा विषय असलेल्या सतीश रणदिवे दिग्दर्शित ‘प्रेमकहानी-एक लपलेली गोष्ट’ या मराठी सिनेमाचे दमदार प्रमोशन नुकतंच मुलुंडच्या वझे केळकर महाविद्यालयात दिमाखात झालं.
अभिनेत्री काजल शर्मा व ‘महाराणा प्रताप’ फेम फैजल खान यांच्या अनोख्या प्रेमकहाणीने वझे केळकर महाविद्यालयाच्या स्नेहसंमेलनात प्रेमाचे अनोखे रंग भरले. या दोघांच्या लाजवाब परफॉर्मन्सला उपस्थितीत विद्यार्थ्यांनी मनमुराद दाद दिली.
‘प्रेमकहानी-एक लपलेली गोष्ट’ या चित्रपटात, एक अनवट वळण येऊन आयुष्यच बदलवून टाकणा-या गोष्टी कशा घडत जातात याचा गुंगवून टाकणारा प्रवास पाहता येणार आहे. महाराष्ट्र व राजस्थान अशा दोन संस्कृतीचे दर्शन ‘प्रेमकहानी’ या चित्रपटातून घडणार असून लालचंद शर्मा निर्मित ‘प्रेमकहानी’ या चित्रपटातून नवोदित अभिनेत्री काजल शर्मा मराठी सिनेसृष्टीत पदार्पण करत आहे. काजल शर्मा व फैजल खान यांच्यासह या चित्रपटात उदय टिकेकर, किशोरी शहाणे-वीज, मिलिंद गुणाजी, निशिगंधा वाड, समीरा गुजर, डॉ. विलास उजवणे, कौस्तुभ दिवाण, राकेश, वैष्णवी रणदिवे यांचाही समावेश आहे. जानेवारी अखेरीला ही ‘प्रेमकहाणी’ प्रेक्षकांच्या भेटीला येणार आहे.