Entertainment News Updates : “पाकिस्तानी कलाकाराकडून भारताला काय धोका?” अभिनेत्रीचा सवाल; म्हणाली, “आपण असुरक्षित…”

अभिनेत्री लक्ष्मी मंचू हिंदुस्थान टाइम्सशी बोलताना म्हणाली, “एकाच वेळी सर्वांवर बंदी घालता येत नाही. एक भारतीय म्हणून आपल्या देशाने या लोकांचे खुल्या मनाने स्वागत केले आहे. आता काय झालंय? राजकारण ही वेगळी गोष्ट आहे, पण सर्वांना एकाच वेळी का रोकायचे? एका कलाकारापासून भारताला काय धोका आहे?”

भारत-पाकिस्तान तणावानंतर भारताविरोधात गरळ ओकणाऱ्या पाकिस्तानी कलाकारांचे सोशल मीडिया अकाउंट्स भारतात बॅन करण्यात आले. त्यावरही लक्ष्मीने प्रतिक्रिया दिली. “त्यांच्या इंस्टाग्राम अकाउंटवर बंदी का घालण्यात आली? आपण त्यांच्यापासून इतके असुरक्षित झालो आहोत?” असे प्रश्न लक्ष्मीने उपस्थित केले.

“कलाकार फक्त चित्रपट बनवत आहेत, समाजाला आरसा दाखवत आहेत आणि त्यांच्यावर बंदी घालणं हे खरंच समजण्यापलीकडचं आहे. कलेला मर्यादित ठेवणं, किंवा त्यावर बंधन घालणं, कलाकार धोकादायक आहेत हे समजणं योग्य तर नाहीच, पण ती भारताची परंपराही नाही,” असं लक्ष्मी मंचू म्हणाली.

सरदारजी ३ मध्ये हानिया आमिर झळकणार असल्याने वाद सुरू आहे, त्याचदरम्यान लक्ष्मी मंचूच्या वक्तव्याने लक्ष वेधले आहे.