पुन्हा एकदा अवधूत गुप्ते यांचे प्रश्न खुपणार!

सुप्रसिद्ध पार्श्वगायक अवधूत गुप्ते यांचे अप्रतिम सूत्रसंचालन असलेल्या ‘खुपते तिथे गुप्ते’ या कार्यक्रमाचे हे पर्व सर्वार्थाने वेगळे असणार आहे. या पर्वाचे खास आकर्षण असणार आहे एक खास ‘खुर्ची’. राजकारण, मनोरंजन क्षेत्र किंवा कॉर्पोरेट जग; जगाच्या पाठीवरील प्रत्येक क्षेत्रात खुर्ची मिळवण्यासाठी चढाओढ पाहायला आणि अनुभवायला मिळतेच. त्यामुळे अवधूत गुप्ते पुन्हा एकदा त्यांच्या खास शैलीत राजकारणी, कलाकार व इतर क्षेत्रांतील मान्यवरांना त्या खास खुर्चीत बसवून खुपणारे प्रश्न विचारण्यास सज्ज झाले आहेत. दरवेळी वाहिनीवर नवी मालिका येणार म्हणजे सुरू असलेली मालिका प्रेक्षकांचा निरोप घेत त्या जागी ती मालिका सुरू होणार हे निश्चित असते. मात्र, या वेळी असे नसून प्रेक्षकांना दर रविवारी ही मालिका पाहता येणार आहे. तसेच, ‘अगं अगं सूनबाई, काय म्हणता सासूबाई’ ही मालिका प्रेक्षकांचा निरोप घेणार असून त्या जागी ‘लवंगी मिरची’ ही मालिका प्रेक्षकांना बुधवार ते शनिवार रात्री १० वाजता पाहता येणार आहे. त्याशिवाय खास प्रेक्षकांच्या आग्रहाखातर दुपारी १२.३० वाजता प्रक्षेपित होणारी ‘यशोदा’ ही मालिका आता दररोज सायंकाळी ६ वाजता प्रेक्षकांना पाहता येणार असून ‘होम मिनिस्टर’ ही मालिका अर्धा तास आधी ५.३० वाजता प्रसारित होणार आहे.