गेल्या काही वर्षांमध्ये मराठी सिनेसृष्टीत अनेक दिग्गज व्यक्तिमत्त्वावर आधारित चित्रपट तयार झाले. त्यातील अनेक चित्रपटांना प्रेक्षकांनी खूप चांगला प्रतिसाद दिला. तर आता लवकरच दिवंगत गायक, संगीतकार सुधीर फडके यांच्या जीवनावर आधारित चित्रपट प्रेक्षकांच्या भेटीला येणार आहे. आता या चित्रपटाबद्दल एक महत्त्वाची माहिती समोर आली आहे.
सुधीर फडके यांच्या बायोपिकची नुकतीच घोषणा करण्यात आली. या चित्रपटामध्ये सुधीर फडके यांची भूमिका कोण साकारणार हे जाणून घेण्यासाठी प्रेक्षक खूप उत्सुक आहेत. अशातच या चित्रपटामध्ये दिवंगत गायिका माणिक वर्मा यांची भूमिका कोण साकारणार हे समोर आलं आहे.
या चित्रपटामध्ये माणिक वर्मा यांच्या भूमिकेत अभिजीत खांडेकरची पत्नी अभिनेत्री सुखदा खांडकेकर दिसणार आहे. नुकतीच सोशल मीडियावर एक पोस्ट शेअर करत तिने ही बातमी चाहत्यांना सांगितली. या चित्रपटाच्या घोषणेच्या कार्यक्रमादरम्यानचा एक व्हिडीओ शेअर करत तिने लिहिलं, “तब्बल ५० वर्षं मराठी चित्रपटसृष्टीवर ज्यांनी राज्य केलं अश्या स्व. सुधीर फडके अर्थात आपल्या सगळ्यांचे लाडके ‘बाबुजी’ ह्यांच्या आयुष्यावर येऊ घातलेल्या ‘स्वरगंधर्व सुधीर फडके’ या योगेश देशपांडे लिखित, दिग्दर्शित चित्रपटाची काल घोषणा झाली. या चित्रपटात स्व.माणिक वर्मा ह्यांची भूमिका मला साकारायची संधी मिळतेय. चित्रिकरण लवकरच सुरू होईल. लोभ असावा.”
हेही वाचा : अभिजित आणि सुखदा खांडकेकर यांचा नवीन घरातील गृह प्रवेशाचे फोटो पाहिलेत का?
आता तिच्या या पोस्टवर कमेंट करत तिथे चाहते आणि मनोरंजन सृष्टीतील तिचे मित्रमंडळी तिचे अभिनंदन करत तिला शुभेच्छा देत आहेत. या चित्रपटात सुधीर फडके यांच्या भूमिकेत अभिनेता सुनील बर्वे दिसणार आहेत. लवकरच या चित्रपटाचं शूटिंग सुरू होईल. त्यामुळे आता या चित्रपटाबद्दल प्रेक्षकांच्या मनात उत्सुकता निर्माण झाली आहे.
