Marathi Actress Girija Oak : गेल्या काही दिवसांपासून मराठमोळी गिरिजा ओक सोशल मीडियावर तुफान ट्रेंड होत आहे. गिरिजाचा साडीतील सुंदर फोटो सर्वत्र व्हायरल होत असून, आता तिला चाहते ‘न्यू नॅशनल क्रश’ म्हणू लागले आहेत. काही दिवसांपूर्वीच गिरिजाने एक मुलाखत दिली होती. याचे व्हिडीओ सुद्धा सर्वत्र व्हायरल होत आहेत. गिरिजाचा स्वभाव, अभिनय शैली, सौंदर्य, स्टार असूनही तिने जपलेला साधेपणा या सगळ्याबद्दल सध्या सोशल मीडियावर चर्चा रंगलीये.
रातोरात सोशल मीडियावर व्हायरल झाल्यावर अभिनेत्री गिरिजा ओकने सुद्धा आनंद व्यक्त केला आहे. तिने व्हिडीओ शेअर करत सगळ्या चाहत्यांच्या आभार मानले आहेत. पण, या सगळ्यात तिने काही महत्तवाचे मुद्दे उपस्थित करत चाहत्यांना विशेष विनंती केली आहे. इंटरनेटवर व्हायरल होणं चांगलंय पण, याचा अनेकजण गैरवापर करून काही फोटो मॉर्फ केले जात आहेत यावर अभिनेत्रीने तीव्र नाराजी व्यक्त केली आहे. तसेच असे विकृत फोटो व्हायरल करू नका, आपण सर्वांनी जबाबदारीने वागलं पाहिजे असंही गिरिजाने सांगितलं आहे.
गिरिजा ओक म्हणते, “सोशल मीडियावर जे काही सुरूये ते भांबावून सोडणारं आहे. अर्थात याचा मला खूप आनंद होतोय…गेल्या काही दिवसात खूप मेसेज आलेत. सर्वांचं भरभरून प्रेम मिळालं आहे. याबद्दल मी तुम्हा सर्वांची खूप आभारी आहे. माझ्या नातेवाईकांनी, मित्रमंडळींनी अनेक फोटो, मीम्स मला पाठवलेत. त्यातल्या काही पोस्ट खूपच क्रिएटिव्ह आहेत. पण, याचबरोबर काही पोस्ट या अश्लील आहेत. AI चा वापर करून हे फोटो एडिट करण्यात आले आहेत. यावरुन एक गोष्ट सांगेन, मी सुद्धा याच काळातील मुलगी आहे…सोशल मीडिया, समाजमाध्यम वापरणारी मुलगी आहे. मला माहितीये जेव्हा एखादी गोष्ट ट्रेंडिंग असते किंवा व्हायरल असते…तेव्हा अशाप्रकारच्या पोस्ट तयार केल्या जातात. AI वापरून हे फोटो विकृत केले जातात किंवा बदलले जातात. ज्यामुळे लाइक्सचा खेळ सुरू होतो आणि या खेळाला कोणतेही नियम नाहीयेत. याची मला भीती वाटते.”
अभिनेत्री पुढे म्हणाली, “मला एक १२ वर्षांचा मुलगा आहे. आता तो सोशल मीडियाचा वापर करत नाहीये. पण, तो मोठा झाल्यावर सोशल मीडिया वापरेल. हे जे मॉर्फ केलेले फोटो आहेत…ते इंटरनेटवर सदैव राहतील. माझ्या मुलाने भविष्यात माझा तसा कोणता मॉर्फ केलेला फोटो पाहिला तर त्याला काय वाटेल? याचा विचार करूनच दडपण येतं. खरंतर, त्याला माहिती असेल हा फोटो खरा नाहीये किंवा हा AI वापरून बनवलेला फोटो आहे. आताही लोकांना असे मॉर्फ फोटो सहज ओळखता येतात.” त्यामुळे असे चुकीचे फोटो लाइक्सच्या खेळात व्हायरल करू नका अशी विनंती गिरिजाने चाहत्यांना केली आहे. ती पुढे काय म्हणालीये पाहुयात…
“हे सगळं बोलून फारसा फरक पडणार नाही हे मला कुठेतरी माहितीये पण, गप्प बसणं मला उचित वाटत नव्हतं. म्हणून मी विनंती करते की, तुम्ही जर त्या लोकांपैकी असाल, जे अशाप्रकारे मॉर्फ फोटो किंवा एडिटेड व्हिडीओ बनवतात तर एकदा या सगळ्याचा विचार करून बघा. याशिवाय तुम्ही अशा फोटोंना लाइक करणारे असाल तर तुम्ही सुद्धा यावर विचार केला पाहिजे की, तुमच्या एका लाइकमुळे असे मॉर्फ फोटो बनवणाऱ्याला अप्रत्यक्ष प्रोत्साहन मिळतं. त्यामुळे आपण सर्वांनीच जबाबदारीने वागलं पाहिजे.”
“यापलीकडे सांगायचं झालं तर, यानिमित्ताने अनेकांना माझ्या कामाबद्दल नव्याने समजलं…यामुळे जर माझी नाटकं, सिनेमे मोठ्या प्रमाणात पाहिले गेले तर यापेक्षा आनंदाची गोष्ट दुसरी कुठलीच नाही. त्यामुळे असंच प्रेम असूद्या. मी सुद्धा असंच काम करत राहीन…आपण सिनेमागृहात किंवा नाट्यगृहात भेटू.” अशी प्रतिक्रिया गिरिजाने दिली आहे.
