Sayali Sanjeev : झी मराठीवरील ‘काहे दिया परदेस’ या लोकप्रिय मालिकेमधून प्रेक्षकांच्या घराघरांत पोहोचलेली अभिनेत्री म्हणजे सायली संजीव. या मालिकेत तिने साकारलेली गौरी आजही प्रेक्षकांच्या लक्षात आहे. या मालिकेनंतर सायलीने अनेक मालिका व चित्रपटांमध्ये काम केलं आहे. अभिनय क्षेत्रात सक्रीय असणाऱ्या सायलीला राजकारणातही तितकाच रस आहे. त्यामुळे भविष्यात अभिनेत्री राजकारणात सक्रीय होणार आहे.
सायली संजीवने नुकतीच ‘सुमन म्युझिक मराठी’च्या ‘आम्ही असं ऐकलंय’ या पॉडकास्टमध्ये हजेरी लावली होती. यावेळी सायलीला ती राजकरणात एन्ट्री करणार आहे का? यावर सायलीने तिची राजकारणात येण्यासाठीची इच्छा व्यक्त केली. तसंच राजकारणाला तरुणांनी करिअरचा एक पर्याय म्हणून बघितलं पाहिजे असं मतही व्यक्त केलं.
याबद्दल सायली म्हणाली, “मला सक्रीय राजकारणात सहभागी होऊन काम करायचं आहे. मी जेव्हा राजकारणात येईन तेव्हा काही गोष्टी कदाचित बदललेल्या असतील. त्यामुळे मला आज ज्या समस्या आहेत त्याकडे बघून मी माझं तेव्हाचं ध्येय ठरवलं, तर त्याचा आता काय फायदा होणार नाही. तेव्हा त्याचा तसा संबंध नसेल.”
यापुढे ती म्हणाली, “मला लहानपणापासून वाटतं की, इथे घाण आहे, हा रस्ता खराब आहे, इथे पाणी नाही किंवा वीज नाही. काही ठिकाणी खड्डे तर आहेतच; पण साधा रस्तासुद्धा नाही. तर याबद्दल आपण सतत तक्रारी करण्यापेक्षा मला असं वाटतं की, आपण ते करुन बघू आणि जर ते आपल्याला जमलं तरच आपल्याला दुसऱ्यांना नावं ठेवण्याचा हक्क आहे. जर आपल्याला जमलं नाही तर ते काम खूप अवघड आहे.”
सायली संजीव इन्स्टाग्राम पोस्ट
यानंतर सायली म्हणाली, “मला वाटतं की, आपण प्रयत्न करुन बघायला हवा. छान रस्ते, रस्त्याच्या दुतर्फा झाडे, स्वच्छता हवी, प्लॅस्टिक नको हे सगळं करण्यासाठी काय मेहनत लागते हे आपणही बघितलं पाहिजे. म्हणजे फक्त व्यवस्थेला आणि शासनाला नावं ठेवण्यापेक्षा त्यात उतरून काय काय करावं लागतं हे बघितलं पाहिजे. आपण जोपर्यंत ते काम करुन बघत नाही. तोपर्यंत आपण दुसऱ्यांना नावं ठेवू नयेत.”
यानंतर सायली म्हणाली, “जर मी कचरा केला आणि तर तो कचरा खिशात ठेवून पुन्हा घरी येऊन कचऱ्याच्या डब्यात टाकण्यासाठी काय मेहनत आणि शिस्त असावी लागते हे मला माहीत आहे. हीच शिस्त सगळ्यांमध्ये येण्यासाठी काय करावं लागेल हे बघितलं पाहिजे.” यानंतर सायलीने राजकारणाला करिअरच्या दृष्टीने बघितलं पाहिजे असं मतही व्यक्त केलं.
याबद्दल सायली म्हणाली, “नवीन मुलांनी राजकारणाचा करिअर म्हणून विचार केला तर हे खूप उत्तम करिअर आहे. आपल्या पिढीतल्या सगळ्यांना आपलं शहर, आपलं राज्य, आपला देश चांगला दिसायला हवा असेल, तर आपल्यासारख्या तरुण पिढीला यात उतरण्याची गरज आहे. हा अभ्यास फार सुंदर आहे.” दरम्यान, सायली आता राजकारणात कधी एन्ट्री करणार, याची तिची चाहते मंडळी वाट पाहत आहेत.
