“काम करताना मरण यावं”, आईची ‘ती’ इच्छा तेजस्विनी पंडित पूर्ण करणार; भावुक होत म्हणाली, “आपली Girls ट्रिप राहिली अन्…”

तेजस्विनीने या पोस्टमध्ये आईची पुस्तक प्रकाशनाची इच्छा पूर्ण करणार असल्याचं म्हटलं आहे. “तुझ्यावरचं पुस्तक मी पूर्ण करेन आणि तुझा प्रेरणादायी प्रवास वाचकांसमोर आणेन असं तिने या पोस्टमध्ये लिहिलं आहे.

तेजस्विनी पंडितची आईसाठी भावनिक पोस्ट

आई
काय बोलू…
अजून Sink In होत नाहीये गं तू नाहीस…
आपली International Girls Trip राहिली, कथाचा पहिला वाढदिवस जोरदार करणार होतो आपण, आपल्या फार्मवर New Year Celebrate करायचं होतं. तुझ्यावरचं पुस्तक प्रकाशन आज तुझ्या वाढदिवसाला करायचं होतं आपल्याला, त्याचं किती काम बाकी राहून गेलं….

आई तू ना प्रचंड हट्टी होतीस. किती वर्षे तुला सांगत होते आधी स्वतःच्या स्वास्थ्याकडे लक्ष दे. पण काम सोडून काहीच सुचलं नाही तुला. मला नेहमी म्हणायचीस काम करता करता मरण यावं. कित्येकदा तुला सांगितलं तुझ्या मुली खमक्या आहेत. तू आता फक्त तुझ्या आनंदासाठी काम कर. तुझ्या terms वर. पण कामाप्रती तुझी श्रद्धा काही औरच होती. आणि बरोबरच आहे, कामात स्वतःचा आनंद असणारी, मानणारी माणसं आजच्या पिढीत क्वचितच सापडतात. खूप निग्रही, निष्ठावंत, मेहनती होतीस तू आई.
खूप धावपळ, खूप काम केलंस. खूप खस्ता खात, कष्ट करत आम्हाला वाढवलंस. कधीच त्या कष्टाची तक्रार केली नाहीस.
पण वयानुसार मन मोठं होत असलं तरी शरीर थकतं हेही समजून घायला हवं होतंस ना गं आई!
का ग अंगावर काढलंस सगळं?
पत्ताच लागू दिला नाहीस काहीच. ३ दिवसात होत्याचं नव्हतं झालं! माझ्या डोक्यावरचं छप्पर हरवलं आई…
बाबा हाक मारता येत नव्हती आता आई हाक मारली तर ओ द्यायला कुणीच नसेल का गं???

आई,
तू कलाकार म्हणून भन्नाटच होतीस, आहेस आणि राहशील.
तुझ्या भारदस्त आवाजाने आणि पाणीदार डोळ्यांनी तू प्रेक्षकांना कायम भारावून टाकायचीस…..
कलाकार हा नेहमीच त्याच्या कलाकृतीतून जिवंत राहतो.
त्यामुळे तू आहेसच, असशीलच.
तुझ्यावरचं प्रेक्षकांचं प्रेम बघून खूप कौतुक वाटायचंच, यावेळेला मात्र अभिमानाने ऊर भरून आला.
तुझ्यासारख्या कलाकाराच्या पोटी मी जन्माला आले यापेक्षा मोठं भाग्य ते काय!!

आणि माझी काळजी करू नकोस. तू स्वतः ऐटीत जगलीस, त्यामुळे मला जसं वाढवलं आहेस तशीच मी जगेन. रूबाबात. fearless. जिंदादिल. आणि दीदी आणि कथाची काळजी घेईन. तुझ्या अर्धवट राहिलेल्या इच्छा आम्ही दोघी मिळून पूर्ण करू! तुझ्यावरचं पुस्तक मी पूर्ण करेन आणि तुझा प्रेरणादायी प्रवास त्या पुस्तकरूपी वाचकांसमोर/ प्रेक्षकांसमोर आणेन.
आता तरी तू आराम कर.
तुझा पुढचा प्रवास ज्योतीर्मय, शांतीने आणि आनंदात होऊदेत.
बाबावर करायचं राहिलेलं सगळं प्रेम करून घे. तुम्हाला आता कुणी वेगळं करू शकत नाही. Cheers
बाबाला माझ्याकडून पप्पी दे. आणि दोघेही आमच्यावर लक्ष ठेवा आणि आशीर्वाद देत रहा बस!!
Until we meet next…
I Love You
Happy Birthday

दरम्यान, ज्योती चांदेकर-पंडित आणि तेजस्विनी पंडित या मायलेकींनी ‘मी सिंधुताई सपकाळ’ या चित्रपटादरम्यान एकत्र काम केलं होतं. या सिनेमासह ज्योती चांदेकर यांनी ‘गुरू’, ‘ढोलकी’, ‘तिचा उंबरठा’, ‘पाऊलवाट’, ‘सलाम’, ‘सांजपर्व’ अशा अनेक चित्रपटांमध्ये महत्त्वपूर्ण साकारल्या आहेत.