मराठी कलाविश्वातील लोकप्रिय अभिनेता प्रथमेश परब सध्या सोशल मीडियावर चर्चेत आहे. ‘टाइमपास’ चित्रपटातून प्रसिद्धी मिळविलेल्या प्रथमेश ‘टकाटक’, ‘उर्फी’, ‘बीपी’, ‘एक नंबर’ अशा चित्रपटातून अभिनयाचा ठसा उमटवला. नुकतंच प्रथमेश अजय देवगणच्या ‘दृश्यम २’ या चित्रपटातही झळकला. मात्र टाईमपास चित्रपटाने तो प्रसिद्धीच्या झोतात आला. या चित्रपटाची आठवण त्याने सोशल मीडियावर शेअर केली आहे.
प्रथमेश परब सोशल मीडियावर सक्रीय असतो. त्याने ‘टाईमपास’ चित्रपटातील फोटो शेअर करत लिहले आहे, “३ जानेवारी दिवसाने माझे पूर्ण आयुष्य बदलले. या दिवसाने मला दगडू नावाची नवी ओळख मिळवून दिली. जी आयुष्यभर माझ्याबरोबर असणार आहे. ज्या दिवसाने मला मोठा ब्रेक दिला. जो प्रत्येक अभिनेत्याला हवा असतो. ज्या दिवसाने स्वप्नांवर विश्वास ठेवायला शिकलो. हा दिवस माझ्यासाठी कायम लक्षात राहील.” अशा शब्दात त्याने आपल्या भावाना व्यक्त केल्या.
‘टाईमपास ३’ हा नुकताच प्रदर्शित झाला होता, ज्यात ऋता दुर्गुळे अभिनेत्री म्हणून दिसली होती. पहिल्या भागात दगडू प्राजक्ता यांची प्रेमकहाणी दाखवण्यात आली होती. कॉलेज विश्वातील प्रेम मग ताटातूट असे चित्रपटाचे कथानक होते. प्रथमेश परब, केतकी माटेगावकर मुख्य भूमिकेत होते. तर वैभव मांगले, भाऊ कदम हे विशेष भूमिकेत होते.
दिग्दर्शक रवी जाधव यांनी ‘टाईमपास’ चित्रपटाचे दिग्दर्शन केले होते. चित्रपटातील संवाद प्रियदर्शन जाधवने लिहले आहे, यात चित्रपटातील गाणी, संवाद विशेष गाजले. ३ जानेवारी २०१४ रोजी हा चित्रपट प्रदर्शित झाला होता. या चित्रपटाने ३३ कोटींची कमाई केली होती.
