“वयाच्या चाळीशीनंतर…”, बॉबी देओलच्या ‘अ‍ॅनिमल’मधील भूमिकेबद्दल उपेंद्र लिमये म्हणाले, “तो प्रचंड भावुक…”

वयाच्या चाळीशीनंतर अलीकडे बऱ्याच अभिनेत्यांना सूर गवसला आहे का? याबाबत सांगताना उपेंद्र लिमये म्हणाले, “वयाच्या चाळीशीनंतर कदाचित बॉबीने गोष्टी अधिक गांभीर्याने घेतल्या असतील असं मला वाटतंय. बॉबी माणूस म्हणून अतिशय चांगला आहे. सगळ्यात महत्त्वाचं म्हणजे आम्ही दोघंही एकत्र खूप क्रिकेट खेळलोय. सेलिब्रिटी क्रिकेट लीगमध्ये अनेकदा बॉबी बॉलिंग आणि मी बॅटिंग करतोय असे प्रसंग उद्भवले आहेत. तेव्हापासून आमची ओळख आहे.”

हेही वाचा : ‘देवमाणूस’ फेम माधुरी पवारने खरेदी केलं आलिशान घर! स्वप्नपूर्ती म्हणत अभिनेत्रीचा नव्या घरात गृहप्रवेश

“मला वाटतं, बॉबीला या चित्रपटाच्या निमित्ताने अतिशय चांगली आणि त्याला साजेशी अशी भूमिका मिळाली. चित्रपट प्रदर्शित झाल्यावर त्याच्या मुलाखती तुम्ही पाहिल्या असतील, तर तो प्रचंड भावुक होत असल्याचं तुम्हाला दिसेल. चित्रपटाला मिळणारं यश पाहून बॉबी संदीपला म्हणाला होता, आयुष्यात एवढं प्रेम मला कधीच मिळालं नाही आणि माझ्या कोणत्याच कलाकृतीची एवढ्या मोठ्या प्रमाणात दखल घेतली गेली नव्हती. बॉबीचे अनेक चित्रपट हिरो म्हणून वर्क झाले नाहीत. त्या सगळ्या गोष्टी त्याला या ‘अ‍ॅनिमल’मधील फक्त २० ते २५ मिनिटांच्या भूमिकेने दिल्या.” असं उपेंद्र लिमयेंनी सांगितलं.

हेही वाचा : Bigg Boss 17 : “मुनव्वरचा हात पकडते, मिठी मारते…”, अंकिता लोखंडे-विकी जैनमधील वाद टोकाला, नेमकं काय घडलं?

‘अ‍ॅनिमल’च्या यशानंतर उपेंद्र लिमये या चित्रपटाचा दुसरा भाग ‘अ‍ॅनिमल पार्क’मध्येही महत्त्वाची भूमिका साकारणार आहेत. दरम्यान, १ डिसेंबरला प्रदर्शित झालेल्या या चित्रपटाने बॉक्स ऑफिसवर रेकॉर्डब्रेक कमाई करून एकूण ८५० कोटींहून अधिक गल्ला जमावला आहे. आता प्रेक्षकांच्या मनात ‘अ‍ॅनिमल’च्या दुसऱ्या भागाबद्दल उत्सुकता निर्माण झाली आहे. आता दुसऱ्या भागात कोणकोणते कलाकार झळकणार हे पाहणं उत्सुकतेचं ठरणार आहे.