…म्हणून मृणाल कुलकर्णी म्हणतेय, ‘वेलकम होम’

चित्रपटाचं कथानक घर, कुटुंब या संकल्पनेवर आधारलेलं आहे. त्यातही स्त्रीचं स्वतःचं घर कोणतं असा प्रश्न उपस्थित करत त्याचा शोध घेण्यात आला आहे. चित्रपटाचं पोस्टर अतिशय सुंदर आणि लक्षवेधी आहे. मृणाल कुलकर्णीची मुख्य भूमिका असलेला ‘वेलकम होम’ हा चित्रपट १४ जून रोजी प्रेक्षकांच्या भेटीला येणार आहे. या चित्रपटाची निर्मिती अभिषेक सुनील फडतरे, विनय बेळे, अश्विनी सिधवानी, दीपक कुमार भगत यांनी केली आहे. तर चित्रपटाचं लेखन सुमित्रा भावे यांचं असून, सुमित्रा भावे आणि सुनील सुकथनकर यांनी दिग्दर्शन केलं आहे.

मराठी चित्रपटसृष्टीमध्ये सुमित्रा भावे आणि सुनील सुकथनकार या लेखक-दिग्दर्शक जोडीचं स्थान अतिशय महत्वाचं आहे. या दोघांनीही आतापर्यंत आशयसंपन्न, विचारप्रवर्तक विषय चित्रपटाच्या माध्यमातून प्रेक्षकांपर्यंत पोहोचवले. विशेष म्हणजे त्यांच्या चित्रपटांचा अनेक सोहळ्यांमध्ये सन्मानही करण्यात आला. अशाच नवा धाटणीचा ‘वेलकम होम’ हा चित्रपट घेऊन ते लवकरच प्रेक्षकांच्या भेटीला येत आहेत.

दरम्यान, या चित्रपटात मृणाल कुलकर्णीसह सुमित राघवन, स्पृहा जोशी, सुबोध भावे, जितेंद्र जोशी, डॉ. मोहन आगाशे, उत्तरा बावकर, सेवा चौहान, सिद्धार्थ मेनन, मिलिंद फाटक, इरावती हर्षे, दीपा श्रीराम, अश्विनी गिरी, रेणुका दफ्तरदार, श्रुती अत्रे, शाल्व किंजवडेकर, प्रांजली श्रीकांत अशी उत्तम स्टारकास्ट आहे.