Pathaan On OTT : शाहरुख खानच्या बहुचर्चित ‘पठाण’ची ओटीटी प्रदर्शनाची तारीख आली समोर; वाचा कुठे आणि कधी पाहायला मिळणार?

या चित्रपटाच्या ओटीटी प्रदर्शनाबद्दल नवीन माहिती समोर आली. ‘पठाण’ ओटीटीवर प्रदर्शनापूर्वी सीबीएफसी बोर्डाने त्यात काही बदल सांगितले आहेत. या बदलांबद्दल सुनावणी होत असताना ‘पठाण’च्या ओटीटी प्रदर्शनाची तारीख समोर आली आहे. दृष्टिहीन प्रेक्षकांनाही चित्रपटाचा आनंद घेता यावा यासाठी दिल्ली उच्च न्यायालयाने ‘पठाण’च्या ओटीटी प्रदर्शनासाठी हिंदी भाषेत ऑडिओ वर्णन, क्लोज कॅप्शन आणि उप-शीर्षके तयार करण्यास सांगितले आहे.

आणखी वाचा : भगव्या रंगाची बिकिनी अन् ब्लेझर; शर्वरी वाघचा बोल्ड लूक पाहून चाहते म्हणाले “ही उर्फी…”

हे बदल केल्यानंतर निर्मात्यांनी हा चित्रपट पुन्हा सीबीएफसी बोर्डाकडे पाठवण्याचे आदेश दिले आहेत. शाहरुखचा पठाण प्राइम व्हिडिओ या ओटीटी प्लॅटफॉर्मवर प्रदर्शित होणार असून २५ एप्रिलपासून तो ओटीटीवर पाहता येणार आहे, पण याआधी सुचवलेले बदल करून सीबीएफसी बोर्डाकडून प्रमाणपत्र घेऊनच हा चित्रपट ओटीटीवर प्रदर्शित करता येणार असल्याचंही स्पष्ट झालं आहे.

‘पठाण’ २५ जानेवारीला चित्रपटगृहात दाखल होणार आहे. त्यानंतर तो एप्रिल महिन्यात ओटीटीवर प्रदर्शित होणार आहे. त्याआधी निर्मात्यांनी चित्रपटात सुचवलेले बदल करून १० मार्चपर्यंत पुन्हा सर्टिफिकेशनसाठी पाठवण्याचे आदेश दिल्ली न्यायालयाने दिले आहेत. अन्यथा ‘पठाण’च्या ओटीटी प्रदर्शनात अडथळा निर्माण होण्याची शक्यता आहे. या चित्रपटात शाहरुख खानबरोबर दीपिका पदूकोण, जॉन अब्राहम, डिंपल कपाडिया, आशुतोष राणा हे कलाकार महत्त्वाच्या भूमिकेत आहेत.