हॉलिवूडमध्ये काम करण्यासाठी हिंदी अभिनेत्यांनी धाडस दाखविण्याची गरज

इंडियन एक्स्प्रेसला दिलेल्या मुलाखतीमध्ये प्रियांका चोप्राने विविध विषयांवर तिच्या प्रतिक्रिया दिल्या. ‘मुंबईत माझ्या कारकिर्दीची सुरुवात झाली. पण, हे सर्व काही इतके सोपे नव्हते. चित्रपटसृष्टीतही सुरुवातीच्या दिवसांमध्ये मला बऱ्याच अडचणी आल्या होत्या’, असे प्रियांका म्हणाली. ‘इतरांकडून आदर मिळवण्याच्या पदापर्यंत पोहोचण्यासाठी तुम्हाला फार मेहनत करावी लागते. त्यामुळे ‘हा हा अभी देखा’ असं म्हणणाऱ्यांपैकी मी नाही. माझ्या वाट्याला आलेल्या यशाचा मला अभिमान आहे. मी त्यासाठी अथक प्रयत्न केले आहेत. मी आजवर कोणत्याही गोष्टीसाठी तडजोड केली नाहीये’, असेही प्रियांका म्हणाली.

बॉलिवूडमधील अभिनेत्यांनी आतापर्यंत हॉलिवूडमध्ये अपेक्षित यश मिळवलेले नाही, यावर भाष्य करताना प्रियांका म्हणाली की, ‘(बॉलिवूडमधील) हे अभिनेते त्यासाठी प्रयत्न करत नाहीत. इथे त्यांनी धाडस दाखविण्याची गरज आहे’, असे म्हणत प्रियांकाने अनेकांचेच लक्ष वेधले. यावेळी हॉलिवूडच्या काही गाजलेल्या कलाकारांना ‘आयएमडीबी’च्या प्रसिद्धी निकषांवर पिछाडणाऱ्या प्रियांकाने यासंबंधीचे तिचे मतही मांडले. या अहवालानुसार प्रियांकाने अभिनेता लिओनार्दो दिकेप्रिओ आणि जेनिफर अॅनिस्टन यांना पिछाडीवर टाकत बाजी मारली होती.

‘मला याबद्दल फारच गर्व वाटत आहे. मी त्या सर्वांची आभारी आहे ज्यांनी आजवर सोशल मीडियावर मला पाठिंबा दिला आहे. माझ्या मते भारतातील काही व्यक्तिंचा या यादीतील पहिल्या दहा नावांमध्ये समावेश असावा. या यादीमध्ये माझे नाव असल्याचा मला फारच आनंद आहे’, असे म्हणत प्रियांकाने तिचा आनंद व्यक्त केला. दरम्यान, काही दिवसांसाठी भारतात परतलेल्या प्रियांकाने नुकतेच ‘कॉफी विथ करण’ या चॅट च्या एका भागाचे चित्रिकरण पूर्ण केले आहे. यावेळी प्रियांकाने बोलण्याच्या ओघात ती भारतात आगामी दोन चित्रपटांच्या बोलणीसाठी आली असल्याचेही स्पष्ट केले.