बॉलिवूड अभिनेता रितेश देशमुख सोशल मीडियावर चांगलाच सक्रीय असतो. सोशल मीडियावर धमाल व्हिडीओ शेअर करत रितेश चाहत्यांचं मनोरंजन करत असतो. नुकताच रितेशने त्याच्या इन्स्टाग्राम अकाऊंटवर एक मजेशीर व्हिडीओ शेअर केलाय. हा व्हिडीओ सोशल मीडियावर चांगलाच व्हायरल होत असून नेटकऱ्यांची व्हिडीओला मोठी पसंती मिळतेय. रितेश देशमुखने जिममधील एक व्हिडीओ त्याच्या इन्स्टाग्राम अकाऊंटवर शेअर केलाय. या व्हिडीओत रितेश त्याच्या जिम ट्रेनरसमोर हात जोडून घरी जाण्यासाठी विनवणी करताना दिसतोय. तर जिम ट्रेनर मात्र रितेशला जबरदस्ती वर्कआउट करण्यास सांगत असल्याचं पाहायला मिळतय. या व्हिडओत रितेश "मला जाऊ द्या माझी आई घरी माझी वाट पाहत आहे." असं म्हणताना दिसतोय. हा व्हिडीओ शेअर करत कॅप्शनमध्ये रितेश म्हणाला, "पेंडुलम - लेग मशीन जिचा मला तिरस्कार आहे." लेग डे असल्याने रितेश जिममधून पळ काढण्याच्या प्रयत्नात असल्याचं या व्हिडीओत दिसतंय. रितेश अनेकदा पत्नी जिनेलियासोबत मजेशीर व्हिडीओ शेअर करत असतो. रितेश आणि जिनेलियाच्या जोडीला चाहत्यांची कायम पसंती मिळताना दिसते. रितेश लवकरच अक्षय कुमारसोबत 'बच्चन पांडे' सिनेमात झळकणार आहे.
