“फसवणुकीचे आरोप खोटे आणि निराधार”, श्रेयस तळपदेच्या टीमकडून स्पष्टीकरण, सांगितलं नेमकं सत्य

याप्रकरणी श्रेयस तळपदेसह इतर १४ जणांविरोधात गुन्हा दाखल करण्यात आल्याचे वृत्त होते. मात्र या सगळ्यात श्रेयस तळपदेचा काहीही संबंध नसल्याचे त्याच्या टीमने सांगितलं आहे. श्रेयस तळपदेच्या अधिकृत सोशल मीडिया अकाऊंटद्वारे याबद्दलची संपूर्ण माहिती देण्यात आली असून अभिनेत्याच्या टीमकडून याप्रकरणी निवेदन सादर करण्यात आले आहे. या निवेदनात नेमकं काय म्हटलं आहे? चला जाणून घेऊ…

श्रेयसच्या टीमने असं म्हटलं आहे की, “आजच्या जगात एखाद्या व्यक्तीने कष्टाने मिळवलेली प्रतिष्ठा निराधार अफवांमुळे अनावश्यकपणे कलंकित होते. हे अत्यंत दुर्दैवी आहे. श्रेयस तळपदे यांच्यावर फसवणूक किंवा गैरवर्तनाचा आरोप करणारे सर्व वृत्त पूर्णपणे खोटे आणि निराधार आहेत.”

अभिनेत्याच्या टीमने पुढे असं म्हटलं आहे की, “एक सार्वजनिक व्यक्तिमत्व म्हणून, इतर अनेक सेलिब्रिटींप्रमाणे श्रेयस तळपदे यांना वारंवार विविध कॉर्पोरेट आणि वार्षिक कार्यक्रमांना आमंत्रित केले जाते, ज्यात ते उपस्थित राहतात. अशा उपस्थितीव्यतिरिक्त, त्यांचा संबंधित कंपनीशी कोणताही संबंध नाही. त्यामुळे त्यांच्यावरील आरोप आणि प्रसारित होणाऱ्या फसव्या किंवा बेकायदेशीर कृत्यांशी त्यांचा कोणताही संबंध नाही.”

श्रेयस तळपदेच्या टीमने पुढे असं म्हटलं की, “आम्ही सर्वांना विनंती करतो की, त्यांनी चुकीची माहिती पसरवण्यापूर्वी तथ्ये पडताळून पहावीत आणि श्रेयस तळपदे यांचे नाव या निराधार अफवांपासून दूर ठेवावे. श्रेयस तळपदे कायद्याचे पालन करणारे नागरिक आहेत. तसेच प्रामाणिकपणा आणि व्यावसायिकतेचा सर्वोच्च मान राखण्यासाठी ते कायमच वचनबद्ध असतात.”

श्रेयस तळपदेच्या टीमने सादर केलेल्या या निवेदनातून त्याने आर्थिक फसवणूक केलेच्या वृत्तांना आता पूर्णविराम लागला आहे. या आर्थिक फसवणूक आणि कथित घोटाळ्याप्रकरणाशी त्याचा काहीही संबंध नाही हे सिद्ध झाले आहे. दरम्यान, श्रेयस तळपदे सध्या झी मराठीवरील ‘चल भावा सिटीत’ या कार्यक्रमातून प्रेक्षकांच्या भेटीस येत आहे.