अजय पूरकर यांचं ६ वर्षांनी मालिकाविश्वात कमबॅक! साकारणार क्रूर-कपटी खलनायक; म्हणाले, “स्टार प्रवाहसारखी…”

‘नशीबवान’मध्ये प्रेक्षकांना गिरीजा नावाच्या एका मुलीची गोष्ट पाहायला मिळेल, जिच्या आयुष्यात अनेक आव्हानं आहेत. आई-वडिलांचं प्रेम नाही, लहान वयातच आलेली घरची जबाबदारी आणि जगण्यासाठीचा संघर्ष असं खडतर आयुष्य गिरीजाच्या नशिबी आलं आहे. मात्र, या कठीण प्रवासात ती नशीबवान आहे याचा उलगडा तिला होतो. गिरीजाचं आयुष्य कसं बदलणार? तिच्या नशिबात नेमकं काय आहे? यात गुंफलेली सुंदर गोष्ट म्हणजे या मालिकेत प्रेक्षकांना पाहायला मिळेल.

या मालिकेत ‘सुभेदार’ सिनेमातील लोकप्रिय अभिनेते अजय पूरकर खलनायकाची भूमिका साकारणार आहेत. ते नागेश्वर घोरपडे ही व्यक्तिरेखा साकारणार आहेत. ही भूमिका अतिशय क्रूर, कपटी अशी आहे. नागेश्वर आपल्या पैशांच्या जोरावर सामान्य माणसांना त्रास देतो. खून करायलाही मागेपुढे बघत नाही. देवीची पूजा करतो. पण, सामान्य लोकांचा अनेकदा राक्षसांसारखा छळ करतो. इतका क्रूर वागूनही तो कधीच कोणत्या केसमध्ये अडकत नाही.

खलनायकाच्या भूमिकेबद्दल अजय पूरकर काय म्हणाले?

नव्या मालिकेत अशाप्रकारचं खुनशी पात्र साकारणं किती आव्हानात्मक आहे हे सांगताना अजय पूरकर म्हणाले, “जवळपास ६ वर्षांनंतर मालिकेत काम करतोय. मला नागेश्वर हे पात्र ऐकताक्षणीच खूप आवडलं. एकतर स्टार प्रवाहसारखी नंबर वन वाहिनी आणि कोठारे व्हिजन्ससारखी निर्मिती संस्था असताना नाही म्हणायचा प्रश्नच नव्हता. महेश कोठारेंबरोबर काम करण्याचं माझं स्वप्न या मालिकेच्या निमित्ताने पूर्ण होतंय. नागेश्वर या भूमिकेला अनेक कंगोरे आहेत. या पात्राच्या अनुषंगाने मालिकेची गोष्ट घडणार आहे. याआधी मी इतका प्रभावशाली खलनायक साकारलेला नाही. त्यामुळे नागेश्वर साकारताना अभिनेता म्हणून माझा कस लागणार आहे.”

अजय पूरकर यांच्यासह लोकप्रिय अभिनेत्री प्राजक्ता केळकर या मालिकेत महत्त्वपूर्ण भूमिका साकारणार आहेत. यापूर्वी त्या ‘स्टार प्रवाह’च्या ‘मुलगी झाली हो’ या मालिकेत झळकल्या होत्या. ‘नशीबवान’ या नव्या मालिकेच्या माध्यमातून अभिनेत्री नेहा नाईक मालिकाविश्वात मुख्य नायिका म्हणून पदार्पण करणार आहे. लवकरच या मालिकेची तारीख आणि वेळ जाहीर केली जाईल.