Bigg Boss 18: ‘बिग बॉस १८’च्या घरात नुकतंच सलमान खानच्या वाढदिवसानिमित्ताने सेलिब्रेशन पाहायला मिळालं. सलमानचा वाढदिवस साजरा करण्यासाठी ‘लाफ्टर शेफ’च्या नव्या पर्वातील कलाकारांनी खास हजेरी लावली होती. कृष्णा, राहूल वैद्य, रुबिना दिलैक यांनी ‘बिग बॉस १८’मधील सदस्यांबरोबर हटके खेळ खेळले. तसंच सदस्यांनी सलमानला वाढदिवसाच्या शुभेच्छा देण्यासाठी खास परफॉर्मन्स केला. आता ‘बिग बॉस’च्या घरात नवीन वर्षाचं जल्लोषात स्वागत केलं जाणार आहे.
नवीन वर्षानिमित्ताने ‘बिग बॉस’च्या घरात काही खास पाहुणे उपस्थित राहणार आहेत. ‘बिग बॉस’च्या १७ पर्वाचा विजेता मुनव्वर फारुकी लवकरच पाहायला मिळणार आहे. यावेळी तो घरातील सदस्यांची खिल्ली उडवताना दिसणार आहे. याचा प्रोमो नुकताच समोर आला आहे.
‘कलर्स टीव्ही’च्या इन्स्टाग्राम पेजवर मुनव्वर फारुकीचा प्रोमो शेअर करण्यात आला आहे. ज्यामध्ये मुनव्वर रजत दलाल आणि करणवीर मेहराची खिल्ली उडवताना दिसत आहे. सुरुवातीला मुनव्वर रजतला म्हणतो की, रजत भाई, हे लोक तुला कितीही यु-टर्न, यु-टर्न म्हणू दे. हे लहान आहेत. यांनी अजून तुझी ड्रायव्हिंग कुठे पाहिलीये. त्यानंतर घरातले सदस्य जोरात हसताना. मग मुनव्वर चुमवरून करणवीर मेहराची खिल्ली उडवतो.
मुनव्वर म्हणतो, “करणभाई ईशान्य भारतात एक राज्य आहे.” तेव्हा कशिश, करण म्हणतो, “अरुणाचल प्रदेश.” यावर मुनव्वर म्हणतो, “नाही, सासर. आता भारतामधील राज्य त्याच नावाने ओळखले जातील. करणचं सासर-१, करणचं सासर -२. हे ऐकून सगळे हसू लागतात.
दरम्यान, ‘बिग बॉस’च्या १८व्या पर्वाचा सध्या १३वा आठवडा सुरू आहे. या आठवड्यात अविनाश मिश्रा, ईशा सिंह, विवियन डिसेना, चाहत पांडे, कशिश कपूर, रजत दलाल आणि श्रुतिका अर्जुन घराबाहेर जाण्यासाठी नॉमिनेट झाले आहेत. ‘बिग बॉस’च्या १८व्या पर्वाच्या महाअंतिम सोहळ्याला अवघे काही आठवडे बाकी आहेत. त्याआधी या सात सदस्यांमधून कोण घराबाहेर होतंय? हे पाहणं महत्त्वाचं असणार आहे.
