सर्वांत मोठा हिंदी रिअ‍ॅलिटी शो ‘बिग बॉस १९’बद्दल दररोज नवीन बातम्या येत आहेत. यापूर्वी असे वृत्त होते की, हा शो वर्षी येणार नाही. त्यानंतर कळले की, त्याचा प्रोमो लवकरच शूट केला जाईल आणि हा शो जुलैमध्येच प्रीमियर होणार आहे. पण आता एक मोठे अद्ययावत वृत्त समोर आले आहे की, ‘बिग बॉस १९’ इतिहास रचणार आहे. हा सीझन आतापर्यंतचा सर्वांत मोठा सीझन असणार आहे, जो ५.५ महिने चालेल.
पिंकव्हिलाच्या वृत्तानुसार, ‘बिग बॉस’च्या निर्मात्यांनी आगामी सीझनसाठी एक मोठा ट्विस्ट आणला आहे. ‘बिग बॉस १९’ सुमारे ५.५ महिने चालेल, जो त्याच्या नेहमीच्या तीन महिन्यांच्या फॉरमॅटपेक्षा वेगळा असेल, ज्यामुळे तो शोच्या इतिहासातील सर्वांत मोठा सीझन ठरेल. या सीझनचे सूत्रसंचालन चाहत्यांचा आवडता सलमान खान करेल आणि नवीन चेहरे स्पर्धक म्हणून पडद्यावर दिसतील.
या दिवशी होणार प्रोमो शूट
अहवालात असेही म्हटले आहे की, सलमान खान जूनच्या अखेरीस ‘बिग बॉस १९’ शोच्या पहिल्या प्रोमोचे शूटिंग करणार असून, नवीन सीझनचा ग्रँड प्रीमियर जुलै २०२५ मध्ये होण्याची शक्यता आहे. हा शो सहसा सप्टेंबर किंवा ऑक्टोबरमध्ये सुरू होतो; परंतु या वर्षी हा शो लवकर प्रीमियर होत आहे.
गेल्या काही वर्षांपासून ‘बिग बॉस’चे ओटीटी व्हर्जन आधी स्ट्रीम होत होते; परंतु यावेळी बिग बॉस ओटीटी व्हर्जन असणार नाही. यापूर्वी शोचे शॉर्ट फॉरमॅट डिजिटल व्हर्जन सुमारे दीड महिना जिओ सिनेमावर स्ट्रीम केला जात होता.
एप्रिलमध्ये ‘बिग बॉस १९’ रद्द झाल्याची बातमी आली होती आणि शोचे निर्माते बनिजय एशियाने माघार घेतल्याचे बोलले जात होते, ज्यामुळे शोवर परिणाम होऊ शकतो. पण त्यानंतर बातमी आली की, कलर्स टीव्ही नवीन निर्मात्यांच्या शोधात आहे आणि निर्माते सापडताच, शोवर काम सुरू केले जाईल.
‘बिग बॉस १९’ हा सलमान खानचा होस्ट म्हणून १६ वा सीझन असेल. ‘वीकेंड का वार’मधील त्याची उपस्थिती नेहमीच शोचे आकर्षण राहिले आहे आणि यावेळीही चाहते त्याला पडद्यावर पाहण्यासाठी उत्सुक आहेत.
