साहेबांचे १७ मिस कॉल होते…; निलेश साबळेची मिमिक्री पाहून राज ठाकरेंनी अचानक केलेला फोन, अभिनेता म्हणाला, “मला कळेना…”

निलेश साबळे ‘लोकशाही’ला दिलेल्या मुलाखतीत म्हणाला, “हा किस्सा बऱ्याच लोकांना माहीत आहे. आम्ही पुरस्कार सोहळ्यात बऱ्याचदा स्किट सादर केलेत. तेव्हा मी एकदा राज साहेबांची नक्कल सुद्धा केली होती. ते शूटिंग सकाळपर्यंत सुरू होतं आणि मी घरी येऊन झोपलो होतो. साधारण दुपारी एक-दीडच्या आसपास मी फोन पाहिला… तेव्हा मला अनेक मिस कॉल आल्याचं मोबाइलमध्ये दिसलं. जवळपास साहेबांचे १७ मिसकॉल आले होते, माझ्याकडे स्क्रीनशॉट सुद्धा आहे. मला कळेना हा नंबर नेमका कोणाचा आहे. त्यानंतर मला आणखी एक फोन आला आणि मी तो उचलला, मला समोरून आवाज आला… झोपलाय का? नंतर करू का फोन? मी विचारलं कोण बोलतंय? ते समोरून म्हणाले राज ठाकरे बोलतोय.

निलेश पुढे म्हणाला, “मला काही क्षण असं वाटलं की, साहेब मला का फोन करतील? मला सुरुवातीला असं वाटलं की आमच्यातला कोणीतरी मित्र माझी मजा घेतोय. कोणीतरी आवाज बदलून बोलत असेल. पण, साहेब पुढे म्हणाले, मला अमेय खोपकरांनी तुमचा व्हिडीओ दाखवला. आता अमेय खोपकरांचं नाव आल्यावर मी लगेच अलर्ट झालो की, खरंच साहेबांचा फोन असेल कारण, मागून अमेय सरांचा आवाज सुद्धा येत होता हे मला जाणवलं. साहेब मला म्हणाले, तुम्ही उशिरा शूटिंग करून आलात असं मला समजलंय त्यामुळे आता तुम्ही झोपा आपण नंतर बोलू…मला नंतर फोन करा.”

“मी त्यांना विनंती केली साहेब तुम्ही बोलू शकता त्यावर ते म्हणाले होते, मला तुमचा कार्यक्रम खूप आवडतो. मला सगळ्या टीमला भेटायचं आहे तुम्ही कधी याल? त्यानंतर आमचं पुढच्या दोन दिवसांत भेटायचं ठरलं. आमची संपूर्ण ‘चला हवा येऊ द्या’ची टीम त्यांच्या घरी गेली होती. राजकारण वगैरे बाजूला राहिलं. फक्त विनोद या एका विषयावर आम्ही जवळपास दोन ते अडीच तास बोलत होतो. त्यांनी सुद्धा अनेक किस्से सांगितले, एक वेगळे राज ठाकरे यानिमित्ताने आम्हाला अनुभवता आले. त्यानंतरही एक-दोन वेळा आमची भेट झाली. त्यांनी स्वत:हून कौतुक केलं होतं, खरंच मला तेव्हा छान वाटलं होतं.” अशा भावना निलेश साबळेने व्यक्त केल्या.