…म्हणून अभिनेत्री दीप्ती केतकर नवऱ्याबरोबर फोटो शेअर करत नाही; म्हणाली…

कलाकार अनेकदा त्यांच्या व्यावसायिक तसेच खासगी आयुष्यातील अनेक फोटो शेअर करत असतात, पोस्ट शेअर करत असतात. त्यावर अनेक जण कमेंट करत त्यांचे मत व्यक्त करतात. कधी कौतुक करतात, तर कधी ट्रोल करतात. आता अभिनेत्री दीप्ती केतकरने ट्रोलिंगबाबत आणि नवऱ्याबरोबर सोशल मीडियावर फोटो शेअर का करत नाही याबद्दल वक्तव्य केले आहे.

“अशा गोष्टींकडे दुर्लक्ष…”

दीप्ती केतकरने नुकतीच ‘राजश्री मराठी’ला मुलाखत दिली. या मुलाखतीत अभिनेत्री म्हणाली, “जर कामाविषयी ट्रोलिंग केलं तर ठीक आहे. सोशल मीडियामुळे असं झालं आहे की लोकांना कोणाबद्दलही बोलायचं असतं किंवा लिहायचं असतं, मात्र तो माणूस त्यामागे किती मेहनत करतोय हे माहीत नसतं. आपल्या इंडस्ट्रीतील सर्वांबद्दल मला कौतुक आहे, कारण सगळे मेहनत करत आहेत. आता कामाबद्दल ट्रोलिंग केलं तर मग ठीक आहे, पण कामापेक्षा जास्त माझ्या केसांबद्दल केलं तर माझ्या पात्राला लोकप्रियता मिळते, त्यामुळे मी आनंदी आहे, काय विचार करायचा.”

“कमला मालिकेत मी जेव्हा काम करत होते, त्यावेळी एका वर्तमानपत्राने माझ्याबद्दल चुकीचे लिहिले होते, तेव्हा मला वाईट वाटलं होतं. पण, मला वाटतं की मी लहान होते. आता काम केल्यानंतर तो समजूतदारपणा आला आहे की अशा गोष्टींकडे दुर्लक्ष केले पाहिजे. लोक तर बोलणारच. मी माझ्या बऱ्याच मैत्रिणींना किंवा माझ्या सासुबाईंच्या मैत्रिणींना सांगते की यूट्यूबवरील सगळ्याच गोष्टी खऱ्या नसतात.”

“तरी ती लगेच…”

सोशल मीडियावर नवऱ्याबरोबरचे फोटो का टाकत नाही? यावर अभिनेत्री म्हणाली, “त्याला आवडत नाही. ‘एका पेक्षा एक’ या शोमध्ये त्याला, आई आणि मायराला आणि माझ्या आईला बोलावलं होतं. त्यानंतर त्याला खूप लोक ओळखू लागले होते, कारण तो प्लॅटफॉर्म मोठा होता. तो म्हणतो की तुझं काम आहे, ते तुझं श्रेय आहे, ती तुझी मेहनत आहे. माझी मुलगीदेखील तशीच आहे. मी इन्स्टाग्रामवर जरी फोटो टाकला तरी ती लगेच डिलिट करते. लोकं म्हणतात की रोमित सर आणि मायराचा फोटो सोशल मीडियावर शेअर करत नाही, आईंचा टाकते. पण, या दोघांनाही आवडत नाही. ते म्हणतात की आम्ही कॅमेराच्या मागे बरे आहोत, समोर नाही.”

“कोणीतरी माझा कोणत्यातरी भलत्याच कलाकाराबरोबर फोटो शेअर केला आहे. तेव्हा मी सांगितलेलं की हा माझा नवरा नाही. गणपतीच्यावेळी एक चॅनेल मुलाखतीसाठी घरी आलेलं. तेव्हा माझा नवरा म्हणाला की, फक्त दीप्ती आणि देवाचं शूटिंग घ्या, बाकी कोणाचं घेऊ नका; त्यामुळे मी घरीदेखील जास्त मुलाखती देत नाही, कारण मला तो खासगीपणा आवडतो. ते माझं घर आहे. तिकडे माझ्यासाठी प्रेम आहे, ते माझ्यासाठी राहू दे, ते लोकांसाठी नाही. लोकांसाठी माझं काम आहे”, असे म्हणत अभिनेत्रीने घरातील सदस्यांबरोबर फोटो का शेअर करत नाही याबद्दल वक्तव्य केले.