‘लाखात एक आमचा दादा'(Lakhat Ek Aamcha Dada) ही मालिका सध्या प्रेक्षकांचे लक्ष वेधून घेताना दिसत आहे. मालिकेत नवीन वळण आल्याचे पाहायला मिळत आहे. तुळजाच्या वडिलांनी रागात तिचे आणि सूर्याचे लग्न लावले होते. त्यांचा त्या दोघांवर राग होता. मात्र, मालिकेत सध्या डॅडी बदलले असून ते चांगले वागत असल्याचे दिसत आहे. डॅडींचा तुळजा आणि सूर्यावरचा राग गेल्याचे पाहायला मिळत आहे. त्यांनी सूर्याच्या संपूर्ण कुटुंबाला घरी जेवायला बोलवत त्यांचे योग्य आदरातिथ्य केल्याचे पाहायला मिळाले. भांगेच्या गोळ्या असलेले जेवण डॅडी आणि सूर्या यांनी खाल्ल्याने अनेक गमतीजमतीदेखील झाल्याचे पाहायला मिळाले. आता मालिकेचा नवीन प्रोमो प्रेक्षकांच्या भेटीला आला आहे.
तुळजाला ‘त्या’ युक्तीसाठी डॅडींकडून शाबासकीची थाप मिळणार
झी मराठी वाहिनीने इन्स्टाग्रामच्या अकाउंटवर ‘लाखात एक आमचा दादा’ या मालिकेचा प्रोमो शेअर केला आहे. या व्हिडीओच्या सुरुवातीला पाहायला मिळते की, डॅडी सूर्याच्या घरात आले आहेत. सूर्याच्या घरात देवाचं दागिनं आलं, अशी घोषणा करण्यात येते. चला आता जोडीनं पूजेला बसा बघू, असे म्हटल्यानंतर सूर्या आणि तुळजा पूजेला बसतात. तोपर्यंत तुळजाचा भाऊ शत्रू सूर्याच्या घराबाहेर येतो. तो सूर्याला उद्देशून स्वत:शीच म्हणतो, तुझा सगळा मान काढतो का नाही बघ. त्यानंतर तो कोणालातरी फोन करतो आणि लाइट कट कर असे सांगतो. अचानक लाइट गेल्याने सगळे गोंधळतात. गावातील एक माणूस म्हणतो, डॅडी तुमच्या घरी पूजा करू. मुहूर्ताची वेळ निघून गेली तर देवीचा कोप व्हायचा. तितक्यात तुळजा सूर्याच्या बहिणींना बोलावते आणि त्यांना काहीतरी सांगते. सूर्याच्या बहिणी पणत्या घेऊन येतात. घर प्रकाशाने उजळून निघते. डॅडी म्हणतात, वाह वाह, शाबास, ही खरी दिवाळी. पूजेला सुरुवात होते.
हा प्रोमो शेअर करताना, झी मराठीने, “शत्रूचा प्लॅन फसणार, घर दिव्यांनी उजळून निघणार…”, अशी कॅप्शन दिली आहे.
मालिकेत दाखविल्याप्रमाणे तुळजाचे सूर्याबरोबरचे लग्न हे तिच्या मर्जीविरुद्ध झाले होते. मात्र, आता त्यांच्यामध्ये जवळीक निर्माण होत असल्याचे झी मराठीने शेअर केलेल्या एका प्रोमोमध्ये पाहायला मिळाले होते. दरम्यान, शत्रू त्याचा प्लॅन फसल्यावर काय करणार हे पाहणे महत्त्वाचे ठरणार आहे.
