Navri Mile Hitlerla Actress Dance Video : जवळपास वर्षभर प्रेक्षकांचं मनोरंजन केल्यावर ‘नवरी मिळे हिटलरला’ या मालिकेने नुकताच सर्वांचा निरोप घेतला. ‘झी मराठी’ वाहिनीवर १८ मार्च २०२४ रोजी, अभिनेत्री वल्लरी विराज आणि अभिनेता राकेश बापट यांची प्रमुख भूमिका असलेली ‘नवरी मिळे हिटलरला’ ही मालिका सुरू झाली होती. या मालिकेने प्रेक्षकांचं भरभरून मनोरंजन केलं. याशिवाय ‘झी मराठी’च्या पुरस्कार सोहळ्यात या मालिकेला बहुतांश पुरस्कारांनी देखील सन्मानित करण्यात आलं होतं.
‘नवरी मिळे हिटलरला’ ही मालिका ऑफ एअर होणार असल्याची बातमी समोर आल्यावर याच्या चाहत्यांनी सोशल मीडियावर नाराजी व्यक्त केली होती. २५ मे २०२५ रोजी या मालिकेने सर्वांचा निरोप घेतला. मात्र, यामधील लीला, अभिराम, दुर्गा, सरोजिनी, किशोर ही सगळी पात्र प्रेक्षकांच्या आजही लक्षात आहेत.
‘नवरी मिळे हिटलरला’ मालिकेतील मुख्य अभिनेत्री वल्लरी विराज सोशल मीडियावर कायम सक्रिय असते. तिचे डान्स व्हिडीओ सर्वत्र विशेष लोकप्रिय ठरतात. अभिनेत्रीने नुकतंच ‘रुपेरी वाळूत माडांच्या बनात ये ना’ या गाण्यावर सुंदर नृत्य सादरीकरण करून सर्वांचं लक्ष वेधून घेतलं आहे. हे नृत्य सादर करताना तिला आलापिनी निसळ या अभिनेत्रीने साथ दिली.
वल्लरी विराजचा सुंदर डान्स
आलापिनीने ‘नवरी मिळे हिटलरला’ या मालिकेत रेवतीची भूमिका साकारली होती. वल्लरी आणि आलापिनीच्या सुंदर एक्स्प्रेशन्सनी या व्हिडीओत सर्वांचं लक्ष वेधून घेतलं आहे. वल्लरीने या व्हिडीओला, “कॉफी शॉपपेक्षा आम्ही माडाचं बन निवडलंय” असं कॅप्शन दिलं आहे.
दरम्यान, वल्लरीच्या व्हिडीओवर नेटकऱ्यांनी कौतुकाचा वर्षाव केला आहे. “Ufff तुमचे एक्स्प्रेशन्स”, “किती गोड आहात तुम्ही दोघी”, “वाह खूप सुंदर”, “अप्रतिम तुम्ही दोघी आणि गाणं पण”, “तुमचे डान्स एक्स्प्रेशन्स कमाल असतात”, “किती सुंदर डान्स केलाय”, “एक्स्प्रेशन्स क्वीन”, “आम्ही तुमच्या मालिकेला मिस करतोय” अशा कमेंट्स या व्हिडीओवर आल्या आहेत.
