Priya Marathe Last post: लोकप्रिय मराठी अभिनेत्री प्रिया मराठेचे ३८ व्या वर्षी निधन झाले आहे. कर्करोगाशी तिची सुरू असलेली झुंज अपयशी ठरली. तिच्या निधनाने मराठी चित्रपटसृष्टीवर शोककळा पसरली आहे. मिरा रोडवरील राहत्या घरी तिने अखेरचा श्वास घेतला.
अभिनेत्रीने आजवर अनेक मराठी-हिंदी मालिकांमध्ये काम करीत एक वेगळी निर्माण केली होती. ‘या सुखांनो या’ या मालिकेतून तिने टेलिव्हिजनवर पदार्पण केले. त्यानंतर ‘तू तिथं मी’, ‘चार दिवस सासूचे’, ‘ऑलमोस्ट सुफळ संपूर्ण’, ‘येऊ कशी कशी मी नांदायला’, ‘तुझेच मी गीत गात आहे’ अशा मालिकांमध्ये तिने विविध धाटणीच्या भूमिका साकारत प्रेक्षकांचे मनोरंजन केले. ‘पवित्र रिश्ता’ मालिकेतील तिची भूमिका विशेष गाजली. या मालिकेत तिने वर्षा ही भूमिका साकारली होती.
त्याबरोबरच तिच्या ‘चार दिवस सासूचे’ या मालिकेतील भूमिकेचेदेखील मोठे कौतुक झाले होते. तसेच, तिने ‘बडे अच्छे लगते है’, ‘उतरन’, ‘कसम से’, ‘साथ निभाना साथिया’ या मालिकांमध्येदेखील काम केले होते. मराठी हिंदी मालिका विश्वातील लोकप्रिय अभिनेत्री म्हणून तिची ओळख होती.
प्रिया मराठेची शेवटची पोस्ट
प्रिया वर्षभरापासून सोशल मीडियावर सक्रिय नव्हती. ११ ऑगस्ट २०२४ ला तिने पती शंतनू मोघेबरोबरचे काही फोटो शेअर केले होते. जयपूरमधील अमेर फोर्टमधील हे फोटो आहेत. प्रियाच्या या जुन्या पोस्टवर चाहते कमेंट्स करीत दु:ख व्यक्त करीत आहेत.
“एक वर्षभरापूर्वीची पोस्ट”, “कॅन्सर झाला होता, धक्कादायक आहे”, “प्रियाचे असे निधन, इतक्या कमी वयात खूप धक्कादायक बातमी आहे. खूप चांगल्या व्यक्तिमत्त्वाची होती. पवित्र रिश्ता या मालिकेतून सर्वांची मने जिंकणारी अर्चनाची बहीण वर्षा आज निघून गेली कायमची. भावपूर्ण श्रद्धांजली”, अशा अनेक कमेंट्स पाहायला मिळत आहेत.
समोर आलेल्या माहितीनुसार, अडीच वर्षांपासून ती कर्करोगाशी झुंज देत होती. सायंकाळी ४ वाजता तिच्यावर अंतिम संस्कार करण्यात येणार आहेत.
