चाहत्याच्या ‘त्या’ मेसेजनं भारावला अभिनेता संकर्षण कऱ्हाडे; पोस्ट शेअर करीत म्हणाला, “आयुष्यभर हेच…”

आपल्या अभिनयानं चर्चेत राहणारा सोशल मीडियावरही सक्रिय असतो. सोशल मीडियावर तो त्याचे अनेक फोटो-व्हिडीओ, तसेच कामाबद्दलची माहिती शेअर करीत असतो. अशातच त्यानं नुकतीच चाहत्याच्या मेसेजची पोस्ट शेअर केली आहे. चाहत्याच्या मेसेजनं भारावून जात संकर्षणनं याबद्दल भारावलेली पोस्ट शेअर केली आहे.

संकर्षणला त्याच्या एका चाहत्यानं सोशल मीडियावर आईच्या वाढदिवसानिमित्त तिला तुझं ‘नियम व अटी लागू’ हे नाटक दाखवत असल्याचा मेसेज केला. त्या चाहत्यानं संकर्षणला केलेल्या मेसेजमध्ये म्हटलंय, “माझ्या आईचा ६० वा वाढदिवस आहे. तिच्यासाठी एक सरप्राइज प्लॅन केलं आहे. तिला तुझं काम खूप आवडतं म्हणूनच तिला आणि तिच्या लहानपणीच्या मैत्रिणींना ‘नियम व अटी लागू’च्या बालगंधर्वमधील प्रयोगाला पाठवत आहे. आई जवळपास ३६ वर्षांनंतर नाटक बघायला येणार आहे. आशा आहे की, तिला हे सरप्राईज आवडेल.”

दरम्यान, हा मेसेज पाहून संकर्षण भारावून गेला आहे. त्याबद्दल त्यानं सोशल मीडियावर भावूक प्रतिक्रिया व्यक्त केली आहे. त्यानं पोस्ट शेअर करीत म्हटलं आहे, “खरं सांगू…? कधी कधी खूप दमायला होतं. एनर्जी कुठून आणू, असा प्रश्नही पडतो. चिडचिड होते. आता मला कोणी नको, असा संताप होतो. पण… पण… असा एक मेसेज सोशल मीडियावर येतो की, कुणीतरी आपल्या आईच्या ६० व्या वाढदिवसाला तिला गिफ्ट म्हणून माझं नाटक दाखवतंय आणि अनेक वर्षांनंतर ती आई हा कलाकार आवडतो म्हणून यायला तयार होते. सगळं बाजूला राहतं आणि असा विचार येतो की, असा प्रयोग व्हावा की, अनेक वर्षं पोरांनी आपल्या आईला आणि आईनं पोरांना म्हणावं ‘जा या कलाकाराचं नाटक बघून ये’ अजून काय पाहिजे? तर हेच पाहिजे. आयुष्यभर हेच पाहिजे…”

संकर्षण कऱ्हाडेनं शेअर केलेली चाहत्याच्या मेसेजची पोस्ट

View this post on Instagram

A post shared by Sankarshann G Karhade (@sankarshankarhade)

लेखक, कवी, अभिनेता, दिग्दर्शक व सूत्रसंचालक अशा अनेक क्षेत्रांत मुशाफिरी करणाऱ्या संकर्षणनं प्रेक्षकांच्या मनात घर केलं आहे. त्यामुळे त्याचा चाहतावर्ग खूप मोठा आहे. त्याच चाहत्यांच्या प्रेमाची पावती संकर्षणला मिळाली आहे.

दरम्यान, संकर्षणच्या कामाबद्दल सांगायचं झाल्यास, त्याची सध्या रंगभूमीवर ‘नियम व अटी लागू’ आणि ‘कुटुंब किर्रतन’ ही दोन नाटकं सुरू आहेत. त्याशिवाय तो झी मराठीवरील ‘आम्ही सारे खवय्ये’ शोचं सूत्रसंचालनदेखील करीत आहे.