“प्रेक्षकांचं प्रेम पाहून आईने काय कमावलं याची प्रचिती…”, ज्योती चांदेकरांच्या मुलीची भावनिक पोस्ट, म्हणाली, “तिचं आयुष्य…”

ज्योती चांदेकर यांच्या पश्चात दोन मुली आहेत. पोर्णिमा पंडित-पुलन आणि लोकप्रिय अभिनेत्री तेजस्विनी पंडित. आज आईच्या आठवणीत पोर्णिमाने भावनिक इन्स्टाग्राम पोस्ट शेअर केली आहे. “आपल्या आईवर प्रेक्षकांचं, तिच्या चाहत्यांचं किती प्रेम होतं, तिने किती मोठ्या प्रमाणात प्रेक्षकांना जोडून ठेवलं होतं, याची प्रचिती आता मला आली” असं पोर्णिमाने तिच्या पोस्टमध्ये म्हटलं आहे.

पोर्णिमा पंडितने व्यक्त केल्या भावना…

मी, प्रेक्षक आणि ज्योती चांदेकर-पंडित (आई )

मला कळायला लागलं त्या वयापासून आपली आई बाकीच्या मित्र-मैत्रिणींच्या आयांपेक्षा वेगळी आहे हे हळूहळू कळू लागलं होतं. आई मला आणि तेजूला कधीच पुरायची नाही, तिचा हवा तेवढा सहवास मिळायचा नाही म्हणून मी आईच्या नाटकांना जायचे. विंगेमधून प्रेक्षक किती आलेत हे छोट्याशा फटीतून लपून बघायचे आणि नेहमी ती गर्दी बघून मला आश्चर्य वाटायचं की, माझ्या आईला बघायला एवढे लोक येतात.

वर्दीवाले आणि नाटक-सिनेमांमध्ये काम करणारे घरी कधी येतील याचा पत्ताच नसतो असं माझी आज्जी म्हणायची.

तेव्हा आपली आई या प्रेक्षकांना छान वाटावं म्हणून तिची कला सादर करत कायम दौऱ्यांवर असते आणि आपल्यापासून लांब असते हे डोक्यात बसलं होतं. माझ्याही पेक्षा प्रेक्षकांचं आईवर जास्त प्रेम आहे हे मला एक मुलगी म्हणून कधीच पटलं नाही. पण आई आता गेली, अशी अचानक आम्हाला सोडून गेली आणि माझा हा विचार अलगद पुसून गेली. पूर्वी नाटक, नंतर सिनेमा आणि आता वयाच्या या टप्प्यात मालिकांमधला प्रेक्षक आणि प्रेम करणारा वर्ग हा वर्षानुवर्षे वाढतच गेला. माझ्या आणि तेजूच्या जवळच्या माणसांनी, कुटुंबाने आम्हाला खूप साथ दिलीच पण तिच्यावर भरभरून प्रेम करणाऱ्या प्रेक्षकांनी जो प्रेमाचा वर्षाव केलाय तो शब्दात मांडणं कठीण…

अजूनही सोशल मीडियावर पूर्णा आजीला रिप्लेस करू नका, तिची जागा कुणीच घेऊ शकत नाही ,पूर्णा आजी गावाला गेली आहे असं दाखवा हीच खरी श्रद्धांजली, असा कलाकार होणे नाही अशा अगणित कमेंट्स पाहून आपल्या आईने काय कमावून ठेवलं, किती प्रेक्षक जोडले आहेत याची प्रचिती आली. आता पटतंय, कलाकार हा आधी प्रेक्षकांचा असतो, मग घरच्यांचा असतो.

माझी आई म्हणजे ज्योती चांदेकर- पंडित
एक रंगकर्मी, कलाकार.
अनेक संकटांमधून वाट काढत ती तिचं आयुष्य थाटात जगली, रूबाबात राहिली, माणसं जोडली, नाती बनवली, प्रेम वाटलं आणि प्रेम मिळवलं.

या दुःखात आमच्यासोबत उभ्या राहिलेल्या आमचा आधार झालेल्या सर्व कुटुंबियांचे, मित्र परिवाराचे आणि प्रेक्षकांचे मनापासून आभार

पोर्णिमा पंडित

दरम्यान, ज्योती चांदेकर आणि तेजस्विनी पंडित या मायलेकींनी ‘मी सिंधुताई सपकाळ’ या चित्रपटादरम्यान एकत्र काम केलं होतं. तर, पोर्णिमा पहिल्यापासून कलाविश्वापासून दूर होती. ‘मी सिंधुताई सपकाळ’ या सिनेमासह ज्योती चांदेकर यांनी ‘गुरू’, ‘ढोलकी’, ‘तिचा उंबरठा’, ‘पाऊलवाट’, ‘सलाम’, ‘सांजपर्व’ अशा अनेक चित्रपटांमध्ये महत्त्वपूर्ण साकारल्या होत्या. याशिवाय गेल्या काही वर्षांत छोट्या पडद्यावरील ‘ठरलं तर मग’सह ‘तू सौभाग्यवती हो’, ‘छत्रीवाली’ या मालिकांमध्येही त्यांनी महत्त्वाच्या भूमिका साकारल्या होत्या.