युक्रेनमधील सध्याच्या युद्धभूमीवर झालंय ‘RRR’च्या हिट गाण्याचं शूटिंग, व्हिडीओ व्हायरल

युक्रेन हा भारतीय चित्रपट निर्मात्यांसाठी आवडता शूटिंग स्पॉट राहिला आहे. या ठिकाणी बऱ्याच भारतीय चित्रपटांचं शूटिंग झालं आहे. मागच्या वर्षी म्हणजे २०२१ मध्ये या ठिकाणी एस एस राजामौली यांचा चित्रपट RRR मधील एका गाण्याचं शूटिंग झालं होतं. राजामौली यांच्या चित्रपटात राम चरण तेजा आणि ज्युनिअर एनटीआर यांच लोकप्रिय गाणं ‘नाटू नाटू’ युक्रेनमध्येच चित्रित करण्यात आलं आहे.

चित्रपटाचं शूटिंग सुरू असताना टीमनं सोशल मीडियावर या लोकेशनचे बरेच फोटो आणि व्हिडीओ शेअर केले होते. शूटिंगच्या वेळी ज्युनिअर एनटीआर आणि रामचरण तेजा यांच्यासह संपूर्ण टीम २ आठवड्यांसाठी युक्रेनमध्ये राहिली होती. या व्यतिरिक्त भारत आणि बल्गारियामध्येही या चित्रपटाचं शूटिंग झालं आहे. जवळपास ४०० कोटींचं बजेट असलेला हा चित्रपट लवकरच प्रेक्षकांच्या भेटीला येणार आहे. दरम्यान सध्या युक्रेनमध्ये सुरू असलेल्या युद्धांच्या पार्श्वभूमीवर या चित्रपटाच्या शूटिंगच्या वेळचे फोटो आणि व्हिडीओ व्हायरल होताना दिसत आहेत.

‘RRR’ चित्रपटाची कथा दोन स्वतंत्र सैनिक कोमाराम भीम आणि अल्लूरी सीतारामा राजू यांच्यावर आधारित आहे. या चित्रपटात अभिनेता रामचरण तेजा आणि ज्युनियर एनटीआर यांच्या व्यतिरिक्त अभिनेत्री आलिया भट्ट आणि अजय देवगण यांच्याही महत्त्वपूर्ण भूमिका आहेत. चित्रपटाचं दिग्दर्शन एस एस राजामौली यांचं असून हा चित्रपट येत्या २५ मार्चला चित्रपटगृहात प्रदर्शित होणार आहे.