खोपोलीत उभ राहतय देशातील पहिलं आयुर्वेदिक कर्करुग्णालय! ३०० कोटींचा प्रकल्प २०२६ पर्यंत पूर्ण होणार…

टाटा मेमोरियल सेंटर आणि केंद्रीय अणुऊर्जा विभाग यांच्या संयुक्त विद्यमाने साकार होत असलेल्या या प्रकल्पासाठी तब्बल ३०० कोटींचा निधी मंजूर करण्यात आला आहे. या रुग्णालयात आधुनिक औषधोपचारांसोबतच आयुर्वेद, पंचकर्म, योग आणि आहारोपचार यांचं समन्वयित उपचारपद्धतीत रूपांतर करण्यात येणार आहे.सुमारे २० एकर परिसरात उभारण्यात येणाऱ्या या केंद्रात संशोधन प्रयोगशाळा, औषधी वनस्पती उद्यान, पंचकर्म केंद्र, तसेच कला आणि संगीत थेरपीसाठी स्वतंत्र विभाग असणार आहे. याशिवाय, रुग्णांच्या शारीरिक आणि मानसिक पुनर्वसनावर भर दिला जाणार असून, आयुर्वेदिक औषधांच्या प्रभावावर वैज्ञानिक अभ्यासदेखील येथे होणार आहे.

कर्करोग रुग्णांना केमोथेरपी आणि रेडिएशनमुळे निर्माण होणारे दुष्परिणाम कमी करण्यासाठी आयुर्वेद उपयुक्त ठरू शकतो. खोपोलीतील हे केंद्र पारंपरिक ज्ञान आणि आधुनिक विज्ञान यांचा पूल बनवेल असे टाटा मेमोरियच्या सूत्रांनी सांगितले. केंद्रीय आरोग्य मंत्रालयाच्या माहितीनुसार, देशात दरवर्षी सुमारे १४ लाख नवे कर्करुग्ण निदान केले जातात. त्यातील बहुतेकांना उपचारानंतर थकवा, भूक मंदावणे आणि मानसिक तणाव यांचा सामना करावा लागतो. या पार्श्वभूमीवर समाकलित आरोग्यकेंद्राची गरज भासू लागली आहे.

या प्रकल्पाच्या पहिल्या टप्प्याच बांधकाम २०२५ च्या अखेरपर्यंत पूर्ण होण्याची अपेक्षा असून, २०२६ मध्ये रुग्णसेवा सुरू करण्याच लक्ष्य ठेवण्यात आलं आहे. त्याचबरोबर, या केंद्रात राष्ट्रीय आयुर्वेद संस्था आणि टाटा मेमोरियल हॉस्पिटलचे संयुक्त संशोधन प्रकल्पही हाती घेतले जाणार आहेत.तज्ज्ञांच्या मते, खोपोलीत उभं राहत असलेलं हे केंद्र देशभरात समग्र उपचाराची नवी दिशा दाखवेल. कर्करोगाविरोधी लढ्यात केवळ औषधोपचार नव्हे, तर जीवनशैली, मनःशांती आणि आहार यांचा समन्वय आवश्यक आहे. आयुर्वेद हेच त्या संतुलनाचं उत्तर ठरू शकत, अस आयुष मंत्रालयातील वरिष्ठ अधिकारी सांगतात.हे केंद्र सुरू झाल्यानंतर मुंबई-पुणे पट्ट्यातील रुग्णांना कर्करोग उपचारांसाठी एक परवडणारा, पूरक आणि समग्र पर्याय उपलब्ध होणार आहे. आयुर्वेदावर आधारित हा प्रयोग यशस्वी ठरल्यास, भारतातील इतर राज्यांमध्येही अशा केंद्रांची मालिका सुरू होण्याची शक्यता तज्ज्ञ व्यक्त करत आहेत.