जे.जे. रुग्णालयात ८३ दिवसांमध्ये १०१ रोबोटिक शस्त्रक्रिया; वेगवान शस्त्रक्रिया करण्यामध्ये पहिल्या स्थानावर

जे.जे. रुग्णालयाचे अधिष्ठाता व शस्त्रक्रिया विभागाचे प्रमुख प्रा. डॉ. अजय भंडारवार यांच्या नेतृत्वाखाली रुग्णालयामध्ये ९ एप्रिल २०२५ रोजी प्रथम रोबोटिक शस्त्रक्रिया करण्यात आली. रोबोटिक शस्त्रक्रियेमुळे गुंतागुंतीच्या शस्त्रक्रियाही कमी रक्तस्राव आणि लहान चिरांद्वारे करणे सहज सोपे झाले, तसेच या शस्त्रक्रिया करण्यात आलेले रुग्ण जलद गतीने बरे होत आहेत.

रोबोटिक शस्त्रक्रिया ही उच्च अचूकता, ३ डी वाढविलेला प्रतिमा दृष्टीकोन आणि शल्यचिकित्सकांना अधिक लवचिक हालचाल देणारे तंत्रज्ञान असल्याने मागील ८३ दिवसांमध्ये जेजे रुग्णालयाच्या रोबोटिक शस्त्रक्रिया तुकडीने पित्ताशय, हर्निया, तसेच गुंतागुंतीच्या जठरांत्र व कर्करोग शस्त्रक्रिया अशा विविध प्रकारच्या शस्त्रक्रिया यशस्वीरित्या पूर्ण केल्या. रोबोटिक शस्त्रक्रिया करणाऱ्या डॉक्टरांच्या तुकडीमध्ये डॉ. भंडारवार यांच्या मार्गदर्शनाखाली डॉ. गिरीश बक्षी, डॉ. अमोल वाघ, डॉ. चंद्रकांत साबळे, डॉ. काशिफ अन्सारी व डॉ. सुप्रिया भोंडवे यांचा समावेश आहे. जे.जे. रुग्णालयामध्ये सुरू करण्यात आलेल्या या रोबोटिक शस्त्रक्रियेमुळे हजारो रुग्णांना याचा लाभ मिळत आहे.

सर्वसामान्यांसाठी रोबोटिक शस्त्रक्रिया वरदान

रोबोटिक शस्त्रक्रिया ही विनामूल्य करण्यात येत असून ही शस्त्रक्रिया सर्वसामान्यांसह आर्थिकदृष्ट्या दुर्बल घटकांतील रुग्णांच्या आवाक्यात आली आहे. तसेच रुग्णांवरआर्थिकदृष्ट्या भार न पडता त्यांना जागतिक दर्जाची सुविधा मिळत असल्याची माहती डॉ. अजय भंडारवार यांनी दिली.

भावी शल्यचिकित्सकांसाठी प्रशिक्षण योजना

मुख्यमंत्र्यांनी दिलेल्या १५० दिवसांच्या विकसित महाराष्ट्र कार्यक्रमांतर्गत १०० रोबोटिक शस्त्रक्रिया करण्याचे उद्दिष्ट्य ठेवण्यात आले होते. या कार्यक्रमाचा विस्तार करून अधिक विशेषज्ञ शाखांचा समावेश करण्याचा निर्णय घेण्यात आला आह. भावी पिढीतील शल्यचिकित्सकांना रोबोटिक तंत्रज्ञानाचे प्रशिक्षण देण्याची योजना आखण्यात आली आहे.

कटिबद्धता, कौशल्य आणि दूरदृष्टी यांच्या बळावर सरकारी संस्थाही अत्याधुनिक रुग्णसेवा सर्व समाजघटकांपर्यंत पोहोचवू शकतात हे यातून सिद्ध झाले आहे. – डॉ. अजय भंडारवार, अधिष्ठाता, जे.जे.रुग्णालय