कोल्हापूरच्या अंबाबाई देवस्थान परिसराच्या विकासासाठी १४३ कोटी

या आराखड्याच्या अंमलबजावणीसाठी व कामे विहित केलेल्या कालमर्यादेत पूर्ण होण्याकरिता संनियंत्रण अधिकारी म्हणून जिल्हाधिकारी, कोल्हापूर यांच्या अध्यक्षतेखाली आराखड्याशी संबंधित सर्व अंमलबजावणी व कार्यान्वयीन यंत्रणांच्या जिल्हा प्रमुखांचा समावेश असलेली एक जिल्हास्तरीय तांत्रिक समिती, गठीत करण्यात येणार आहे. या समितीमध्ये जिल्हा नियोजन अधिकारी सदस्य सचिव असतील. जिल्हास्तरीय तांत्रिक समितीची शक्यतो प्रत्येक महिन्यात एक बैठक घेण्यात यावी. अशा बैठकीस इतर जिल्हा प्रमुख यांना आमंत्रित करण्याबाबत संनियंत्रण अधिकारी म्हणून जिल्हाधिकारी, कोल्हापूर यांना अधिकार देण्यात आले आहेत. ही कामे ३१ मार्च २०२८पर्यंत पूर्ण करण्याचे नियोजन आहे.

विकास आराखड्यात ही कामे होणार

मंदिर परिसरात सुमारे साडेबाराशे भाविकांच्या क्षमतेचे दर्शन मंडप, शौचालय पिण्याचे पाणी, पादत्राणे ठेवण्याची व्यवस्था, व्हिनस कॉर्नरजवळ भक्त निवास उभारण्याची योजना आहे. यामध्ये भक्तांसाठी अद्ययावत सुविधा उपलब्ध करून देण्यात येतील. बहुमजली वाहनतळ, अन्नछत्र, मंदिराभोवती पादचारी मार्ग व बिंदू चौक ते भवानी मंडपापर्यंत पादचारी मार्ग, त्याचप्रमाणे मंदिराचे जतन संवर्धन, अंतर्गत सुधारणा, दर्शन मंडप आदींचा यामध्ये समावेश आहे.