मुंबईसाठी २६८ वातानुकूलित लोकल; राज्य मंत्रिमंडळाची मंजुरी, विद्यमान भाड्यात गारेगार प्रवास

राज्यातील पायाभूत सुविधांचे जाळे अधिक भक्कम करताना सामान्य प्रवाशांना अधिक दिलासा देणाऱ्या काही महत्वाच्या प्रकल्पांना मुख्यमंत्री देवेंद्र फडणवीस यांच्या अध्यक्षतेखाली झालेल्या बैठकीत मंगळवारी मान्यता देण्यात आली. काही दिवसांपूर्वी मुंब्रा स्थानकाजवळ रेल्वेतून पडल्याने चार प्रवाशांचा मृत्यू झाल्यानंतर दरवाजे स्वयंचलित करण्याची घोषणा करण्यात आली होती.

या निर्णयास प्रवाशांनी विरोध केल्यानंतर आता वातानुलित गाड्यांची संख्या वाढवून सध्याच्याच भाड्यात वातानुकूलित सेवा देण्याचा निर्णय राज्य आणि केंद्र सरकारने घेतला आहे. त्यानंतर मुंबई महानगर प्रदेश विकास योजनेच्या (एमयूटीपी) टप्पा ३ व ३ ए अंतर्गत नव्या २६८ वातानुकुलित गाड्यांची खरेदी करण्यास मंत्रिमंडळ उपसमितीने मान्यता दिली. जुन्या गाड्यांना टप्प्याटप्प्याने हटवून त्याऐवजी वातानुकूलित गाड्या उपलब्ध करून दिल्या जातील. विशेष म्हणजे तिकीट दरांमध्ये कोणतेही बदल होणार नसल्याचे मुख्यमंत्र्यांनी आवर्जून सांगितले. केंद्र सरकारच्या मान्यतेनंतर नवीन गाड्यांची खरेदी सुरू होणार असल्याचेही त्यांनी स्पष्ट केले.

‘मेट्रो-११’ला मंजुरी

मुंबईतील मेट्रोचे जाळे अधिक मजबूत करण्यासाठी वडाळा ते गेट वे ऑफ इंडिया दरम्यान २४ हजार कोटी रुपये खर्चाच्या ‘मेट्रो मार्गिका-११’ या महत्त्वाकांक्षी प्रकल्पाला मान्यता देण्यात आली. आणिक आगार ते गेटवे ऑफ इंडिया दरम्यान १७.५१ किलोमीटर लांबीचा मार्ग भूमिगत असून त्यावर एकूण १४ स्थानके असतील. आणिक आगार हे स्थानक जमीनीवर तर वडाळा आगार, सीडीएस काॅलनी, गणेश नगर, बीपीटी रुग्णालय, शिवडी मेट्रो स्टेशन, हे बंदर, दारुखाना, भायखळा मेट्रो स्टेशन, नागरपाडा जंक्शन, भेंडी बाजार, छत्रपती शिवाजी महाराज मेट्रो स्टेशन, हॉर्निमल सर्कल आणि गेट वे ऑफ इंडिया ही १३ स्थानके भूमिगत असतील. जपानी आंतरराष्ट्रीय सहकार्य संस्थेकडून (जायका) निधी उपलब्ध होणार आहे. मुंबई मेट्रो रेल कार्पोरेशन (एमएमआरसीएल) या प्रकल्पाची उभारणी करेल. बेस्टच्या सहकार्याने संयुक्त विकास प्रकल्पांतर्गत व्यावसायिक कॉम्प्लेक्स उभारला जाणार असून, त्यातून बेस्टला अतिरिक्त उत्पन्न मिळेल. हा प्रकल्प २०३१पर्यंत पूर्ण करण्याचे नियोजन आहे. त्याचा दररोज ५.८० लाख प्रवाशांना फायदा होईल. नवीन प्रकल्पाच्या कामामुळे पूर्व द्रुतगती मार्गावर फ्री वेवरून खाली उतरल्यावर छत्रपती शिवाजी महाराज स्थानकापर्यंत वाहतूक कोंडी होण्याची चिन्हे आहेत.

ठाणे ते नवी मुंबई विमानतळ उन्नत मार्ग

ठाणे ते नवी मुंबई आंतरराष्ट्रीय विमानतळादरम्यान २५ किलोमीटर लांबीच्या उन्नत मार्गामुळे ठाणे, नवी मुंबई आणि मधल्या औद्योगिक क्षेत्रांना वेगवान व समर्पित दळणवळण मार्ग उपलब्ध होणार आहे. या उन्नत मार्गामुळे ठाण्यातून नवी मुंबईतील प्रवास जिकरीचा होणार नाही याची खबरदारी सरकारला घ्यावी लागले. कारण उन्नत मार्गासाठी मध्येच रस्ते खोदून ठेवल्यास वाहनचालकांना नाहक मनस्ताप सहन करावा लागू शकतो.

नागपूर, पुण्यासाठीही प्रकल्प

उपराजधानी नागपूरमध्ये नवीन रिंग रोड उभारण्यास तसेच नागपुरात एक नवनगर तयार करण्यास मान्यता देण्यात आली. रिंग रोडमुळे नागपूरमधील वाहतूक कोंडी कमी होण्यास मदत होईल. पुणे–लोणावळा उपनगरी रेल्वे मार्गावर तिसरी व चौथी मार्गिका उभारणीस मान्यता देण्यात आली आहे.