मुंबई : अकरावीच्या चौथ्या विशेष प्रवेश फेरीनंतर मुंबई महानगरक्षेत्रातील कनिष्ठ महाविद्यालयांमध्ये केंद्रीय प्रवेश प्रक्रिया आणि कोटय़ातील जागांवर अर्ज करणाऱ्या एकूण २ लाख ५९ हजार १३६ (८९.९६ टक्के) विद्यार्थ्यांचे प्रवेश आतापर्यंत निश्चित झाले आहेत. अकरावीच्या तब्बल १ लाख २९ हजार ९९ जागा रिक्त असून अर्ज केलेल्या जवळपास २८ हजार ९१८ विद्यार्थ्यांना प्रवेश मिळणे बाकी आहे. प्रवेशाची पाचवी विशेष प्रवेश यादी सोमवार, ११ सप्टेंबर रोजी सकाळी १० वाजता ऑनलाइन पद्धतीने जाहीर करण्यात येणार आहे. पाचव्या विशेष प्रवेश फेरीअंतर्गत महाविद्यालय मिळालेल्या विद्यार्थ्यांना सोमवार, ११ सप्टेंबर (सकाळी १० वाजल्यापासून) ते शुक्रवार, १५ सप्टेंबर या कालावधीत प्रवेश निश्चित करावा लागणार आहे.
