१ ऑक्टोबरपासून अंमलबजावणी
पश्चिम आणि मध्य रेल्वेच्या हार्बर व ट्रान्स हार्बर मार्गावरील प्रवाशांना येत्या ऑक्टोबरपासून दिलासा मिळणार आहे. १ ऑक्टोबरपासून या मार्गावर ६० जादा लोकल फेऱ्या चालवण्यात येणार असून यामध्ये ३२ फेऱ्या पश्चिम, तर हार्बर आणि ट्रान्स हार्बर मार्गावर प्रत्येकी १४ फेऱ्या असतील. मुख्य मार्गासाठी १२ जादा फेऱ्या असून त्या फेऱ्यांचा नवीन वेळापत्रकात समावेश करण्याबाबत मात्र काही निर्णय झालेला नाही.
पश्चिम रेल्वेवर ३२ लोकल फेऱ्या चालवताना २९ फेऱ्या या उपनगरासाठी, तर ३ फेऱ्या या फक्त चर्चगेटपर्यंत असतील. महत्त्वाची बाब म्हणजे २९ पैकी २० फेऱ्या अंधेरी ते विरार दरम्यान आणि दादर ते विरार दरम्यान ९ जादा लोकल फेऱ्या चालवल्या जातील.
यातील सकाळी आणि संध्याकाळी गर्दीच्या वेळी प्रत्येकी चार लोकल फेऱ्या धावतील. त्यामुळे या पट्टय़ातील प्रवाशांना गर्दीचा सामना करावा लागणार नाही. पश्चिम रेल्वेवर दररोज १३२३ लोकल फेऱ्या होतात. जादा फेऱ्यांमुळे फेऱ्यांची संख्या ही १३५५ पर्यंत पोहोचेल.
नवीन फेऱ्या चालवताना अंधेरी ते बोरिवलीपर्यंतच्या पाचव्या मार्गिकेचाही वापर केला जाईल. या मार्गिकेवरून सात लोकल फेऱ्या चालवल्या जातील. तसेच मध्य रेल्वेच्या सीएसएमटी ते पनवेल या हार्बर आणि ठाणे ते पनवेल या ट्रान्स हार्बर मार्गावर प्रत्येकी १४ अशा एकूण २८ वाढीव फेऱ्याही चालवण्यात येणार असल्याची माहिती मध्य रेल्वेकडून देण्यात आली.
