मुंबईः तीन अल्पवयीन मुलींसमोर अश्लील कृत्य करून त्यांचा विनयभंग करणाऱ्या ५८ वर्षीय आरोपीला पोलिसांनी सोमवारी अटक केली. आरोपी दारूखाना परिसरातील रहिवासी असून त्याच्याविरोधात विनयभंग व बालकांचे लैंगिक अत्याचारापासून संरक्षण (पोक्सो) कायद्याअंतर्गत गुन्हा दाखल करण्यात आला आहे.
तक्रारदार मुलगी १२ वर्षांची आहे. ती तिच्या दोन मैत्रिणींसह रविवारी रात्री जात होती. त्यावेळी त्यांना एका व्यक्तीने खूणावले. परिचित व्यक्ती वाटल्यामुळे त्या थांबल्या. त्यांनी पीडित मुलींकडे पाहून अश्लील कृत्य केले. त्यानंतर त्यांच्याकडे पाहून शिवीगाळ केली. या प्रकारामुळे तिन्ही मुली घाबरल्या. त्यांनी सोमवारी या प्रकाराबाबत पोलिसांकडे तक्रार केली.
पोलिसांनी प्रकरणाचे गांभीर्य लक्षात घेऊन तात्काळ भारतीय न्याय संहिता कलम ७९ व पोक्सो कायद्याअंतर्गत गुन्हा दाखल केला. त्यानंतर पोलिसांच्या पथकाने आरोपीला राहत्या परिसरातून अटक केली. आरोपी गटार साफ करण्याचे काम करतो.
अल्पवयीन मुलांविरोधातील गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्याअंतर्गत १३४१ गुन्ह्यांची नोंद झाली होती. २०२३ मध्ये पोक्सो कायद्याअंतर्गत ११०८ गुन्ह्यांची नोंद झाली होती.
२०२४ मध्ये मुंबईत पोक्सो कायद्याअंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे. २०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते.
याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याचे प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांविरोधातील घडलेल्या अत्याचाराच्या घटनांमध्ये बहुसंख्य आरोपी परिचित व्यक्ती आहेत. तसेच काही प्रकरणांमध्ये अल्पवयीन आरोपींचा सहभाग असल्याचेही निष्पन्न झाले होते.
