अभिनेते अजय पूरकर साकारणार खलनायक, ‘अभंग तुकाराम’ चित्रपटात ‘मंबाजी’च्या भूमिकेत

दिग्पाल लांजेकर दिग्दर्शित ‘अभंग तुकाराम’ चित्रपट ७ नोव्हेंबरला चित्रपटगृहात प्रदर्शित होणार आहे. पॅनोरमा स्टुडिओज ही निर्मिती संस्था या चित्रपटाचे प्रस्तुतकर्ते आहेत. तर निर्माते हे कुमार मंगत पाठक, अभिषेक पाठक असून, सहनिर्माते मुरलीधर छतवानी, रवींद्र औटी आहेत.

संत तुकाराम महाराजांचे वाढते प्रस्थ पाहून ज्यांच्यापोटात दुखत होते त्यात मंबाजी आघाडीवर होते. काही ना काही तरी कुरापत काढायची आणि संत तुकाराम महाराजांना छळायचे हे त्यांचे नित्याचेच काम होते. ‘मंबाजी’ यांची क्रूरता एवढी होती की संत तुकाराम महाराजांना गुरुस्थानी मानणाऱ्या बहिणाबाई यांनी त्याचे वर्णन ‘विंचवाची नांगी । तैसा दुर्जन सर्वांगी’ असे केलेले आहे. या ‘मंबाजी’च्या भूमिकेत अभिनेते अजय पूरकर दिसणार आहेत.

‘मंबाजी’ या आपल्या खलनायकी भूमिकेबद्दल बोलताना अजय पूरकर म्हणाले की, ‘याआधीच्या माझ्या बऱ्याच भूमिका सकारात्मक प्रवृत्तीच्या होत्या. आजवरच्या माझ्या प्रत्येक भूमिकेला प्रेक्षकांचे भरभरून प्रेम मिळाले आणि आता नाण्याच्या दुसऱ्या बाजूला येऊन एक वेगळा प्रयत्न या चित्रपटातून मी केला आहे. ही व्यक्तिरेखा कमाल ताकदीची आहे. कलाकार म्हणून स्वीकारलेली ही व्यक्तिरेखा मला खूप महत्त्वाची वाटते. कलाकार म्हणून माझ्या प्रत्येक भूमिकेमध्ये मी वेगळेपण कसे आणू शकतो हे महत्त्वाचे आहे. ‘अभंग तुकाराम’ चित्रपटातील या भूमिकेच्या निमित्ताने मला ही संधी मिळाली.’

‘अभंग तुकाराम’ चित्रपटाची कथा आणि संवाद प्रसिद्ध लेखक योगेश सोमण यांचे आहे. दिग्पाल लांजेकर यांनी पटकथा आणि दिग्दर्शनाची जबाबदारी सांभाळली आहे. तर चित्रपटाचे छायांकन संदीप शिंदे, संकलन सागर शिंदे व विनय शिंदे, रंगभूषा अतुल मस्के, वेशभूषा सौरभ कांबळे, संगीत संयोजन आणि पार्श्वसंगीत मयूर राऊत, ध्वनी आरेखन निखिल लांजेकर व हिमांशू आंबेकर, साहसदृश्ये बब्बू खन्ना, नृत्यदिग्दर्शन सुमित साळुंखे, कलादिग्दर्शन प्रतीक रेडीज व संजय करोले, निर्मिती पश्चात प्रक्रिया सचिन भिल्लारे यांची आहे.

तसेच व्ही. एफ. एक्स.ची जबाबदारी शॉक अँड ऑ फिल्म्स यांनी, तर व्हिजुअल प्रमोशनची जबाबदारी कॅटलिस्ट क्रिएटस यांनी सांभाळली आहे. सिनेमन एंटरटेनमेंटचे जय गोटेचा मार्केटिंग डायरेक्टर आहेत. तर कार्यकारी निर्मात्या केतकी गद्रे – अभ्यंकर आहेत.